کۆرۆنا بەشێوەیەکی بەرچاو لە بەندیخانەکانی عێراق بڵاوبووەتەوە

SNN

کۆمیسیۆنی باڵای مافەکانی مرۆڤ لە عێراق هۆشداریدا لە داڕمانی رەوشتی تەندروستی بەندیخانەکانی عێراق بەهۆی ڤایرۆسی کۆرۆناوە، کە بەشێوەیەکی بەرچاو تیایاندا بڵاوبووەتەوە.

عەلی بەیاتی ئەندامی کۆمیسیۆنی باڵای مافەکانی مرۆڤ لە عێراق، لە کۆنفرانسێکی رۆژنامەنووسیدا رایگەیاند: “چەندین تووشبووی کۆرۆنا لەنێو بەندیخانەکاندا هەن، هەروەها ژمارەیەک فەرمانبەری چاکسازییەکانیش تووشی ڤایرۆسەکە بوون”.

بەیاتی ئاماژەی بەوەشکرد کە مەترسی ئەوە هەیە ژمارەی تووشبووان لەنێو بەندیخانەکانی عێراقدا روو لە هەڵکشان بکات، ئەمەش بەهۆی ئەوەیە کە رێکارەکانی تەندروستیی جێبەجێ ناکرێت.

جەختی لەوەش کردەوە کە پێویستە چەند رێکارێکی پێویست بگیرێتەبەر بۆ ئازادکردنی ئەو گیراوانەی کە تێوەنەگلاون بە کردەی تیرۆریستی و ئەو تاوانانەی کە زیان بە ئاسایشی دەوڵەت دەگەیەنن.

عەلی بەیاتی روونیکردەوە توانای ئێستای بەندیخانەکان سێ هێندەی ئەو ژمارەیەیە کە لە بنەڕەتدا دەبێت تیایدابن.

لەلای خۆشیەوە ئوسامە نوجێفی سەرۆکی بەرەی رزگاری نیشتمانی عێراق، داوای لە مستەفا کازمی کرد رێکاری بەپەلە بگرێتەبەر بۆ ئازادکردنی گیراوان، ئەمەش لەپێناو پاراستنی سەلامەتییان.

بەپێی دوایین ئاماری وەزارەتی تەندروستیی عێراق، ژمارەی تووشبووان بە ڤایرۆسی کۆرۆنا گەیشتووەتە زیاتر لە 53 هەزار کەس، لەنێویاندا دوو هەزار و 160 گیانلەدەستدان هەبووە و 27 هەزار و 912 نەخۆشیش دوای چارەسەری پزیشکیی، چاکبوونەتەوە.