حکومەتی عێراق بەڕەسمی یاداشتی ناڕەزایی دەداتە باڵیۆزی تورکیا لەبەغدا
لۆگۆی حکومەتی عێراق و کۆماری تورکیا
SNN-
حکومەتی عێراق بەشێوەیەکی رەسمی داوای هەرچی زووی راگرتنی بۆردوومانەکانی تورکیا دەکات و دوو یاداشتی ناڕەزاییش دەداتە باڵیۆزی ئەو وڵاتە.
حکومەتی عێراق دەڵێت: “بۆردوومانەکانی تورکیا بۆ سەر گوند و چیاکانی هەرێمی کوردستان زیان بە ئاشتی هەرێمایەتی دەگەیەنێت و دەبێت هەرچی زووە رابووەستێت”.
ئەحمەد مەلا تەڵاڵ وتەبێژی رەسمیی حکومەتی عێراق رایگەیاند “بەمدواییانە حکومەتی تورکیا دەستدرێژیی یەک لەدوای یەکی کردۆتە سەر خاکی عێراق، بەتوندی ئیدانەی ئەو کارەی ئەنقەرە دەکەین کە زیان بە دۆستایەتیمان دەگەیەنێت”.
وتەبیژی حکومەتی عێراق دەشڵێت: “بەرپرسیارێتیی گیانی و مادی هاوڵاتیان دەکەوێتە ئەستۆی لایەنی تورکی و دوو یاداشتی توندی ناڕەزایەتیش دراوە بە تورکیا”.
داواشیکرد کۆمەڵی نێودەوڵەتی بەمهۆیەوە بێتە دەنگ و ئارامی ناوچەکە لەدەست نەدات، وتیشی: “حکومەتی عێراق مافی خۆی بەکاردێنێت بۆ پاراستنی گیانی هاوڵاتیانی وڵاتەکەی”.
