تورکیا سەرباز و تەقەمەنییەکی بێشومار دەباتە سوریا

SNN-

میدیا و چالاکوانانی سوریی ئاشکرایانکردووە کە ئێوارەی ئەمڕۆ سێ قافڵە سەرباز و زیاتر لە 70 بارهەڵگری چەک و تەقەمەنی تورکیی لەڕێگەی دەروازەی (کەفەرلوسین)ەوە چووەتە ناو خاکی سوریا و لەباکووری شاری ئیدلب جێگیر کراون.

هێزەکەی سوپای تورک بۆ خۆ توندکردن هاتووەتە ناوچەکە و لەگەڵ خۆیان بەربەستی کۆنکرێتیشییان هێناوە تا بنکە و بارەگا سەربازییەکانی خۆیانیانی پێ بەهێز بکەن.

روانگەی سوریش بۆ مافەکانی مرۆڤ رایگەیاندووە کە هێزەکەی تورکیا زرێپۆش و ئامێری چاودێریشیان بردۆتە شاخی زاویە بۆ رووماڵکردنی جووڵە لەناوچەکەدا.

لەو کاتەوە کە دوایین بڕیاری ئاگربڕ لەسوریا دەرچووە، تا ئەمڕۆ 4515 بارهەڵگر و تفاقی سەربازی چوونەتە ناو خاکی سوریاوە سەرەڕای ناردنی هەزاران سەرباز.

لەسەرەتای مانگی شوباتی ئەمساڵیش تا ئەمڕۆ 7850 پارچە چەک و زرێپۆش و گواستەرەوەی سەرباز و 11 هەزار سەربازی سوپای تورک لەسوریا جێگیر کراون.