بزوتنەوەی گۆڕان: پشتیوانی تەواوی تیمی خۆمان دەکەین لە حکومەتدا

SNN-

بزوتنەوەی گۆڕان رایدەگەیەنێت: جەختدەکەنەوە لەسەر ئەنجامدانی چاکسازی و گۆڕانکاری ریشەیی و دەشڵێت: “لەم چوارچێوەیەدا پشتیوانی تەواوی تیمی خۆمان دەکەین لە حکومەتدا”.

ئەمڕۆ پێنجشەمە، 9ی 7ی 2020 جڤاتی نیشتیمانی بزوتنەوەی گۆڕان کۆبونەوەی ئاسایی خۆی بە بەشداری تیمی گۆڕان لە حکومەتی هەرێم ئەنجامدا. کۆبونەوەکە، تایبەت بووە بە رەوشی سیاسی، ئابوری و حوکمڕانی هەرێمی کوردستان و عێراق.

لەدوای کۆبوونەوەکەش بزوتنەوەکە راگەیەنراوێکی بڵاوکردەوە و تێیدا رایدەگەیەنێت: “جڤاتی نیشتیمانی بزوتنەوەی گۆڕان بە وردی هەڵسەنگاندنی بۆ بەشداری لە کابینەی نۆی حکومەتی هەرێم کرد. قەیرانی قوڵی سیاسی و ئابوریی و دارایی هەرێمی کوردستان ئەنجامی حوکمڕانی خراپ و نادادپەروەری و گەندەڵی رابردووە. هەروەها، جەختی کردەوە لە سەر ئەنجامدانی چاکسازی و گۆڕانکاری ریشەیی.

دەشڵێت: “بەشداری بزوتنەوەی گۆڕانیش لە کابینەی نۆ تەنیا بەئامانجی چاکسازیکردنە و لەم چوارچێوەیەشدا پشتیوانی تەواوی تیمی خۆی دەکات لە حکومەتدا”

بزوتنەوەی گۆڕان پێیوایە، حکومەتی هەرێمی کوردستان پێویستە پابەند بێت بە راگەیەندراوی کۆتایی کۆبوونەوەی ئەنجومەنی وەزیران لە 21ی 6ی 2020 کە تەنها بۆ یەک مانگ مووچەی فەرمانبەران کەم ئەکرێتەوە و ئەو رێکارە کاتییە. بزوتنەوەی گۆڕان جەختدەکاتەوە کە حکومەتی هەرێم  پابەند بێت بەو بەڵێنەوە.

راگەیەنراوەکە چەند خاڵێکیشی دوای کۆبوونەوەکە خستۆتەڕوو کە ئەمەی خوارەوە دەقەکەیەتی:

١. چاکسای ریشەیی لە کەرتی نەوت و گاز، داهاتی ناوخۆ، خاڵە سنورییەکان، باج ئەنجامبدرێت.

٢. رێکەوتن لەگەڵ حکومەتی فیدراڵی بە پێویست ئەزانێت، لەم پێناوەشدا پێویستە هەردوولا پابەندی ماف و ئەرکەکانیان بن.

٣. پێویستە دەستەبەجێ تەواوی داهات بگەڕێتەوە بۆ خەزێنەی حکومەت و کۆتایی بە قۆرخکاری و دەستێوەردانی کۆمپانیای حیزبی بهێندرێت. ئەمەش هەنگاوێکی گرنگە بۆ زیادکردنی داهات و پێدانی موچەی هاونیشتیمانیان لە کاتی خۆیدا.

سێیەم: چاکسازی لە ناو هێزەکانی پێشمەرگە و پۆلیس و هێزەکانی ناوخۆ بکرێت بە نەهێشتنی دەستی حیزب لەناویاندا و کردنیان بە دامەزراوەی نیشتیمانی.

چوارەم: مانەوە و گەشەکردنی هەرێمی کوردستان بەندە بە بنیاتنانی پایەکانی حکومڕانی باش، بەدەستهێنانەوەی متمانەی هاونیشتیمانیان، جێبەجێکردنی ستراتیژی هاوسەنگی لە پەیوەندییە هەرێمی و نێودەوڵەتیەکان.

پێنجەم: سەبارەت بە پەیوەندی نێوان لایەنە سیاسیەکان پێویستە کۆتایی بهێندرێت بە دروستکردنی گرژی و ئاڵۆزی دەستکرد و لاوەکی، کە لە روانگەی ئێمەوە بیانوە بۆ دواخستن و خۆدزینەوە لە ئەنجامدانی چاکسازی ریشەیی.

شەشەم: بزوتنەوەی گۆڕان ئاڵوگۆڕ و گۆڕانکاری لە حکومەتی خۆجێی پارێزگای سلێمانی، هەڵەبجە، ئیدارەی راپەڕین و گەرمیان ئەنجام دەدات.