“رەوشی تەندروستی لە پێنجوێن بەرەو کۆنتڕۆڵ دەڕوات”
وێنە: عەلی حەمە سەعید/SNN
SNN-عەلی حەمە سەعید
بەرپرسی تیمی كۆرۆنا لە مەرزی نێودەوڵەتی باشماخ ئاشكرایكرد لە ئێستادا رەوشی تووشبووانی ڤایرۆسی كۆرۆنا لە سنووری قەزای پێنجوێن بەرەو كۆنتڕۆڵ دەڕوات و رێژەی تووشبوون بە ڤایرۆسەكە بە رێژەیەكی زۆر كەمی كردووە.
هێرش عەلی، بەرپرسی تیمی كۆرۆنا لە مەرزی نێودەوڵەتی باشماخ ئەمڕۆ هەینی بە SNNی راگەیاند: لە ئێستادا بە بەراورد بە دوو هەفتەی پێشوو رێژەی تووشبوون بە ڤایرۆسی كۆرۆنا لە سنووری قەزای پێنجوێن بە رێژەی زۆر دابەزیوە كە جێگای خۆشحاڵی ئێمەیە، هاوكات ئەو كەسانەشی كە لە ماوەی دوو هەفتەی رابردوودا تووشی كۆرۆنا بووبوون دوای وەرگرتنی چارەسەر بەشی زۆریان چاكبوونەتەوە.
ئاماژەی بەوەشكرد، هۆكاری كەمبوونەوەی تووشبوون بە ڤایرۆسی كۆرۆنا بۆ ئەوە دەگەڕێتەوە كە خۆشبەختانە هاووڵاتیان گەیشتوونەتە ئەو بڕوایەی كە تەنها خۆپارێزی چارەسەری ئەم ڤایرۆسەیە، هاووڵاتیانی سنوورەكە پابەندی رێنماییە تەندروستییەكانن، هاوكات لە مەرزی باشماخیشەوە ڕێگەنادەین هیچ شۆفێرێكی ئێرانی بێتە ناوخاكی هەرێم ئەمەش كاریگەری باشی هەبووە لە خێرا كۆنتڕۆڵكردنی دۆخەكە.
وتەكانی بەرپرسی تیمی كۆرۆنا لە مەرزی نێودەوڵەتی باشماخ، لە كاتێكدا دوێنێ سەدان دەروێش لە مەرزی باشماخەوە هاتنەناو هەرێمی کوردستان بە مەبەستی بەشداریکردنیان لە پرسەی سەرۆکی تەریقەتی قادری، وتەبێژی وەزارەتی تەندروستی هەرێمیش رایگەیاند: “دەروێشەکان وەک هەڵگری ڤایرۆسی کۆرۆنا سەیردەکەین و بە مەترسی بۆ هەموو ئەو ناوچانە دادەنێین کە بەناویدا تێپەڕیون”.
لەلایەکی دیکەوە ئەمڕۆ خالید عەبدوڵا، بەڕێوەبەری تەندروستی پێنجوێن رایگەیاند: “سکاڵای یاسایی دژ بە دەروێشەکان تۆماردەکەین کە بە نایاسایی هاتنە ناو خاکی هەرێمی كوردستانەوە”.
