هیچ پشوویەک تاقیکردنەوەکان ناگرێتەوە

SNN-هەوراز ئەحمەد

سبەی 14ى تەمووز لە سەرجەم دام و دەزگاکانى هەرێمى کوردستان و عێراق پشووى فەرمیە بەڵام تاقیکردنەوەکان لە وادەى خۆیاندا ئەنجام دەدرێت.

بەکر محەمەد، بەڕێوبەرى پەروەردەى رۆژئاوای سلێمانى رایگەیاند: “هیچ پشوویەک تاقیکردنەوەکان ناگرێتەوە ئەو خشتەى وەزارەتى پەروەردە دایناوە وەکو خۆى و لە کاتى خۆیدا جێبەجێ دەکرێت چونکە ئەگەر پشوو بکەوێتە نێو تاقیکردنەوەکانەوە ئەوا ناتوانین لە کاتى خۆیدا تاقیکردنەوەکانى وەرزى دووەم ئەنجام بدەین”.

وتیشى: “لە هۆڵەکانى تاقیکردنەوەدا هەموو رێکارە تەندروستیەکان جێبەجێ دەکرێت و ئامێرەکانى فێنککەرەوە بۆ قوتابیان دابین کراوە و تاوەکو ئێستاش هیچ گرفتێکمان نیە”.

لە سەرەتاى هەفتەى داهاتوو تاقیکردنەوەکانى پۆلى 12 لە هەرێمى کوردستان دەستى پێکردوە، بە گوێرەی ئاماره‌کانى وەزارەتی پەروەردە، 144 هەزار و 142 خوێندکار بەشداری بە تاقیکردنەوەکان دەکەن، بۆ ئەم مەبەستەش دوو هەزار و 338 هۆڵ لە سەرتاسەری هەرێمی کوردستان ئامادەکراون.

سبەینێ 62 ساڵ بەسەر شۆڕشی 14ی تەمووز تێدەپەڕێت كە تیایدا كۆتایی بە سیستمی پادشایەتی لە عێراقدا ھێنرا.