داعش پروپاگەندەی لە تۆڕە کۆمەڵایەتییەکان دەستپێکردووەتەوە
SNN
بە گوێرەی پەیمانگایەکی توێژینەوەی بەریتانی، لە ماوەی رابردوودا داعش لە رێگەی هەژمارە ساختەکانیەوە پروپاگەندەی لە تۆڕە کۆمەڵایەتییەکان زیاتر کردووە.
پەیمانگەی گفتوگۆ ستراتیژییەکان لە لەندەن لە راپۆرتێکیدا نوسیویەتی، لایەنگران و ئەندامانی داعش لە رێگەی دروستکردنی هەژماری ساختەوە ئەو وێنە و ڤیدیۆ و بابەتانەیان بڵاوکردووەتەوە کە تووندوتیژی و کوشتن نیشاندەدەن و خەڵک هاندەدەن بۆ ئەنجامدانی تووندوتیژی و ئەندامبوون لە داعش.
پەیمانگە بەریتانییەکە بۆ ماوەی سێ مانگ چاودێری 288 هەژماری کەسانی سەر بە داعشی کردووە و بۆی دەرکەوتووە داعش هەڵمەتێکی ئەلیکترۆنی بە ناوی “فەوارس ئەپڵۆد” دروستکردووە بۆ هێرشکردنە سەر پەیجی سەرکردە سیاسی و سەربازییەکانی ئەمریکا.
هاوکات ئەندامانی رێکخراوەکە لە رێگەی هەژمارە ساختەکانیانەوە وێنە و ڤیدیۆی تووندوتیژی و هەڕەشەیان لە بەشی نووسینی کۆمێنتی پەیجەکان داناوە، هەروەها لە پەیجی دۆناڵد ترەمپ وێنەکانی 11ی سێپتێمبەریان داناوە.
پەیمانگاکە نوسیویشیەتی، داعش ڤیدیۆی چۆنیەتی دروستکردنی بۆمبی لە ماڵەوە بڵاوکردووەتەوە، هەروەها بۆ ئەوەی ڤیدیۆ و وێنەکانیان لە لایەن سیستمی فەیسبووکەوە نەناسرێنەوە، لۆگۆی ئاژانسە میدیاییە جیهانییەکانی لەسەر داناون.
فەیسبووک هەموو ئەو بابەتانە دەسڕێتەوە کە هانی تووندوتیژی دەدەن، بەڵام ئەندامانی داعش هەندێ فێڵیان بەکارهێناوە و فلتەرەکانی فەیسبووک نەیاتوانیوە بیاندۆزنەوە.
