خانەنشینێك لەكاتی وەرگرتنی مووچەكەیدا گیانی لەدەستدا

SNN-عەلی حەمە سەعید
 ئەمڕۆ لە كاتی دابەشكردنی مووچەی خانەنشینی شارستانی، لە یەكێك لە بنكەكانی دابەشكردنی مووچە بەهۆی قەرەباڵخی و رێكنەخستنی ریزی مووچەخۆران و دروستبوونی پاڵەپەستۆ، خانەنشینێكی تەمەن 70 ساڵ گیانی لەدەستدا.

ئارام كەمال، یەكێك لەو شایەدحاڵانەی كە خۆی لە شوێنی رووداوەكە بووه‌ بە SNNی راگەیاند: “پێشنیوەڕۆی ئەمڕۆ كاتێك رۆیشتمە بنكەی دابەشكردنی مووچەی خانەنشینی كارەباكە لە شاری سلێمانی بە مەبەستی وەرگرتنی مووچەی خانەنشینی دایكم، بەهۆی قەرەباڵغی زۆر و دروستبوونی پاڵەپەستۆ، یەكێك لەو كەسانەی كە بە مەبەستی وەرگرتنی مووچەی خانەنشینییەكەی هاتبوویە ئەو بنكەیە گیانی لەدەستدا”.

وتیشى: “ئەو هاووڵاتییە تەمەنی نزیكەی 70 ساڵ دەبوو، بەهۆی رێكنەخستن و ریزنەكردنی خانەنشینانەوە ئەو قەرەباڵغی و پەستانە دروستبووە، هاوكات بەرزی پلەكانی گەرماش هێندەی دیكە حاڵی خانەنشیانی قورستركردووە لە وەرگرتنی مووچەكانیاندا هەرچەندە لەوێ‌ پۆلیس و چەند لایەنێكی دیكەی پەیوەندیدار بوونیان هەبوو، بەڵام بەداخەوە ئەو حاڵەتە نەخوازراوە روویدا”.

ئەو شایەتحاڵە ئەوەشی خستەڕوو: “دوابەدوای گیانلەدەستدانی ئەو خانەنشینە، پۆلیس و لایەنە پەیوەندیدارەكان بە ئۆتۆمبێلی فریاگوزاری تەندروستی گەیشتنە شوێنی رووداوەكە و تەرمەكەیان گواستەوە بۆ پزیشكی دادی سلێمانی”.