وەزیری دەرەوەی فەرەنسا سەردانی هەولێر دەکات
SNN- مەودا مستەفا
ئێوارەی ئەمڕۆ وەزیری دەرەوەی فەرەنسا سەردانی هەولێر دەکات و چاوی بە بەرپرسانی هەرێم دەكەوێت.
بڕیارە ئەمڕۆ پێنجشەمە ژان ئیف لۆدریان وەزیری دەرەوەی فەرەنسا سەردانی بەغدا و دواتریش هەولێر بکات و لەگەڵ بەرپرسانی هەرێمی كوردستان کۆببێتەوە.
پەیامنێری SNN لە هەولێر رایگەیاند: بڕیارە ژان ئیف لۆدریان لەگەڵ نێچیرڤان بارزانی سەرۆکی هەرێمی کوردستان و مەسرور بارزانی سەرۆکی حکومەتی هەرێمی کوردستان و مەسعود بارزانی سەرۆکی پارتی دیموکراتی کوردستان کۆببێتەوە.
سەبارەت بە سەردانەکەی بەغداشی، بە گوێرەی زانیارییەکانی SNN، وەزیری دەرەوەی فەرەنسا لەلایەن هاوتا عێراقیەکەیەوە پێشوازی لێدەکرێت و دواتریش بە بەشداری جێنین پلاسخارت نوێنەری گشتیی نەتەوە یەکگرتووەکان لە عێراق لەگەڵ هەریەک لە سەرۆککۆماری عێراق و سەرۆکوەزیرانی عێراق کۆدەبێتەوە.
بڕیارە وەزیری دەرەوەی فەڕەنسا تاوتوێی چەند بابەتێک بکات و باسی ئەو پڕۆژانەیش دەکات کە فەڕەنسا بە نیازە وەک هاوکارییەک لە عێراق ئەنجامی بدات.
شایانی باسە لە ساڵی 2019 وەزیری دەرەوەی فەرەنسا دوو جار سەردانی هەرێمی كوردستانی كردووە و لە شەڕی داعشیشدا فەرەنسا یەكێك بوو لەو وڵاتانەی هاوكاری سەربازی پێشكەشی پێشمەرگە كرد.
