ئاگر لە کەمپێکی ئاوارە ئێزیدییەکان کەوتەوە

SNN

سەرلەبەیانی ئەمڕۆ ئاگر لە کەمپێکی ئاوارە ئێزیدییەکان لە زاخۆ کەوتەوە، بەڵام هیچ زیانێکی گیانی نەبوو.

نەدیار نەجبی، بەڕێوەبەری كەمپی قادیا لە زاخۆ رایگەیاند: “كاتژمێر پێنجی بەرەبەیانی ئەمڕۆ هەینی، ئاگر لە كەمپی قادیای سنوری زاخۆ كەوتەوە و بەهۆیەوە حەوت كابینەی ئاوارەكان بەتەواوی سوتان”.

وتیشی: “ئاگرەكە زیانی گیانی نەبووە، تەنیا زیانی ماددی هەبووە و بەتەواوی هەموو كەلوپەلەكانی ناو كابینەكان سوتاون، لە ئێستاشدا ئاگرەکە کۆنتڕۆڵکراوە.”

ئەمە دووەمجارە ئاگر لەم كەمپەدا دەكەوێتەوە و زیانی ماددی بە ئاوارەکان دەگەیەنێت.