بەریتانیا تەواوی هێزەکانی لە بنکەی سەربازی تاجی کشاندەوە

SNN

وەزارەتی بەرگریی بەریتانیا رایگەیاند، خولێکی شەش مانگی مەشق و راهێنانی بە هێزە ئەمنییەکانی عێراق تەواوکردووە و دواتریش هێزەکانی لە بنکەی سەربازی تاجی لە باکووری بەغدا کشاندووەتەوە.

لە راگەیەندراوەکەی وەزارەتی بەرگریی بەریتانیادا هاتووە: “ئەگەرچی هێزەکانی بەریتانیا بنکەی سەربازی تاجییان جێهێشتووە، بەڵام نزیکەی 100 راوێژکاری بەریتانی لە عێراق دەمێننەوە و لە ئەرکەکانیان بەردەوام دەبن”.

راشیگەیاند: “راوێژکارە سەربازییەکانی بەریتانیا تا ئێستا مەشق و راهێنانیان بە 120 هەزار پێشمەرگە و ئەندامانی هێزە ئەمنییەکانی عێراق کردووە”.

لە راگەیەندراوەکەی وەزارەتی بەرگریی بەریتانیادا باس لەوەشکراوە: “ئەگەرچی داعش هیچ ناوچەیەکی لەژێر دەسەڵاتدا نەماوە بەڵام بەردەوامە لە هێرشەکانی کە بەشێوەی پارتیزانی ئەنجامیان دەدات”.

بەریتانیا جگە لە مەشق و راهێنانکردن بە هێزە ئەمنییەکان، لە رێگەی هێرشی ئاسمانییەوە بەردەوامە لە پشتیوانیکردنی هێزە ئەمنییەکانی عێراق لە شەڕی دژ بە داعش.