دەروازەیەکی نوێی بازرگانی نێوان هەرێم و ئێران كرایەوە
SNN-عەلی حەمە سەعید
قایمقامی قەزای ناوەندی پارێزگای هەڵەبجە ئاشكرایكرد، ئەمڕۆ یەكشەممە بە ئامادەبوونی قایمقامی قەزای پاوەی رۆژهەڵاتی كوردستان و چەند لایەنێكی دیكەی پەیوەندیدار، بە مەبەستی زیادکردنی قەبارەی ئاڵوگۆڕی بازرگانی نێوان هەرێم و ئێران و زیاتر کارئاسانی بۆ شۆفێرانی مەرزی شۆشمێ، دەرگای دووەمی مەرزی تەوێڵە شۆشمێ مان بەڕووی ئۆتۆمبێلە بارهەڵگرەكاندا كردەوە.
نوخشە ناسیح، “قایمقامی قەزای ناوەندی پارێزگای هەڵەبجە بە SNNی راگەیاند: بەمەبەستی زیاتر گرنگیدان بەبواری بازرگانی لە نێوان هەرێم و ئێران بە تایبەت لە سنووری قەزاكانی هەڵەبجە و پاوەی ڕۆژهەڵاتی كوردستان، ئەمڕۆ بە ئامادەبوونی قایمقامی قەزای پاوەو بەڕێوەبەری ناحییەی نەوسودی رۆژهەڵاتی كوردستان، پێكەوە دەرگای دووەمی مەرزی تەوێڵە-شۆشمێمان بەڕووی هاتوچۆی ئۆتۆمبێلە بارهەڵگرەكانی هەردوو لادا كردەوە”.
ئاماژەی بەوەشكرد، “كردنەوەی ئەم دەرگایە لەلایەك كارئاسانی زیاتر دەكات بۆ شۆفێرانی ئۆتۆمبێلە بارهەڵگرەكان، لەلایەکی دیكەشەوە هۆكارێك دەبێت بۆ كەمكردنەوەی قەرەباڵغی ناومەرزەكە و هەروەها زیاتركردنی قەبارەی ئاڵوگۆڕی بازرگانی لەنێوان هەردوولاماندا”.
قایمقامی پاوە ئاماژە بەوەدەكات “ئێمە لای خۆمانەوە ماوەی 10 مانگە مەرزی شۆشمێمان بەڕەسمی ناساندووە و بە مەرزیكی فەرمیشی دەهێڵینەوە، بەڵام بەداخەوە كە لایەنی هەرێم و عێراق هێشتا بەفەرمی ناساندنی مەرزەكەیان بەئێمە رانەگەیاندووە و ماوەی 10 مانگە چاوەڕێیان دەكەین”.
كردنەوەی دەرگای دووەمی مەرزی تەوێڵە شۆشمێ لە كاتێكدایە كە پێشتریش پەروێزی ئیدەپور، قایمقامی پاوەی ڕۆژهەڵاتی كوردستان تایبەت بەSNNی ڕاگەیاندبوو، ئێمە 10 مانگی تەواوە لای خۆمانەوە مەرزەكەمان بە فەرمی ناساندووە و هەر وەك مەرزێكی فەرمیش مامەڵەی لەگەڵ دەكەین، بۆیە چاوەڕێی بەرپرسانی باڵای عێراق و هەرێم دەكەین بۆ ئەوەی ئەوانیش هاوشێوەی ئێمە ئەو مەرزە بەفەرمی بناسێنن و بە ئێمەشی رابگەیەنن ئێمە لەوبارەیەوە هیچ گرفتێكمان نییە.
