وەزیری نەوتی ئێران: کەس نەوتمان لێ ناکڕێت

SNN-

وەزیری نەوتی ئێران رایدەگەیەنێت: “هیچ وڵاتێکی بیانی ئامادە نییە گرێبەستی نەوتیمان لەگەڵ مۆر بکات لە ئێستادا و ئەو گرێبەستانەی پێشتریش هەبوون هەڵوەشاونەتەوە”.

بیژەن زەنگەنە، وەزیری نەوتی ئێران ئەوەشی ئاشکرا کردووە “کە گرێبەستێکیان لەگەڵ هندستان هەبووە بۆ پەرەپێدانی کێڵگەی غازیی فەرزاد، بەڵام ئەویش هەڵوەشاوەتەوە”.

ئەو لێدوانانەی وەزیری نەوتی ئێران لەمیانی مەراسیمی ئیمزاکردنی چەند گرێبەستێکدا بوو لەگەڵ وڵاتی چین بەمەبەستی پەرەپێدان و کارکردن لەکێڵگەی غازی سروشتیی لە کێڵگەی ئازادکانی باشوور.

زەنگەنە ئەوەشی وت: “لەو کێڵگە غازییەدا 25 ملیۆن تەن وزەی پیترۆکیماویات لە ئێران بەرهەمدەهێنرێت و بەرهەمهێنان بۆ 100 ملیۆن تەن بەرز دەکاتەوە و هەناردەش بۆ 25 ملیار دۆلار بەرز دەکاتەوە”.

زەنگەنە راشیگەیاند “کە جگە لە ئیسرائیل لەگەڵ هەر وڵاتێکدا بیانەوێت گرێبەستی هاوبەشیی نەوت و وزە ئیمزا دەکەن تەنانەت گەر ئەمریکاش بێت”.