پەرلەمانی میسر رێگەی دا بە سوپا کە بچێتە ناو خاکی وڵاتێکی دیکەوە

SNN-

بەهۆی ئەو بارودۆخەی ئێستا لە لیبیا هاتۆتە ئاراوە، پەرلەمانی میسر لە دانیشتنێکی نهێنیدا رەزامەندی دەربڕی بە رێگەدان بە سوپای وڵاتەکەی بچێتە ناو خاکی هەر وڵاتێکی بیانییەوە گەر بزانێت هەڕەشەیە بۆ سەر ئاسایشی سنوورەکانی خۆی.

میدیای میسری بڵاویکردۆتەوە کە پەرلەمانی وڵات عەبدولفەتاح سیسی سەرۆککۆماری سەرپشک کردووە لەکاتی پێویستدا هێز بجووڵێنێت بۆ ناو خاکی هەر وڵاتێکی بیانی کە زانرا هەڕەشە دروستبووە لەسەر ئاسایشی وڵاتەکەی.

دانیشتنەکەی پەرلەمانی میسر نهێنیی بووە و نزیکەی 400 پەرلەمانتار تێیدا ئامادە بوون و ئەمڕۆ دووشەممە دوور لە چاوی میدیاکان بەڕێوەچووە کە سەرۆک و جێگر و سەرۆکی لیژنە پەیوەندیدارەکانیش ئامادەی بوون.

لە ساڵی 2011ەوە لیبیا ململانێ و ناکۆکیی تووندی چەکداریی بەخۆیەوە دەبینێت لەنێوان ئەو لایەنە دژبەرانەی لە دەرەوە هاتوون و دەستیان لە دۆخی ئەو وڵاتە وەرداوە.

پێشتر سەرۆکی میسر کە پشتیوانێکی تووندی لیوا خەلیفە حەفتەر فەرماندەی سوپای نیشتمانی لیبیا-یە رایگەیاندبوو “داوایان لە پەرلەمانی وڵات کردووە کە رێگە بدات سوپای میسر بچێتە ناو خاکی لیبیا”.