ئەمڕۆ کازمی سەردانی ئێران دەکات

SNN

بە گوێرەی چەند بەرپرسێکی حکومی عێراق، ئەمڕۆ مستەفا کازمی سەرۆکوەزیرانی عێراق سەردانی ئێران دەکات.

چەند بەرپرسێکی حکومی بە میدیاکانی عێراقیان راگەیاندووە: “کازمی لەلایەن عەلی رەزا وەزیری وزەی ئێرانەوە لە فڕۆکەخانەی میهرئاباد لە تاران پێشوازی لێدەکرێت”.

لە ئەجێندای سەردانەکەیدا هاتووە، کازمی لەگەڵ شاندێکی یاوەریدا لەگەڵ حەسەن روحانی سەرۆککۆماری ئێران کۆدەبێتەوە، هەر لەو کۆبوونەوەیەدا ئیسحاق جیهانگیری جێگری سەرۆکی ئێران بەشدار دەبێت.

بڕیاریشە کازمی لە سەردانەکەیدا، کە ماوەی دوو رۆژ دەخایەنێت، چاوی بە عەلی خامنەئی رابەری باڵای ئێران و محەمەد باقر قالیباف سەرۆکی پەرلەمانی ئێران بکەوێت.

شاندەکەی کازمی پێکهاتوون لە وەزیرانی دەرەوە، نەوت، کارەبا، دارایی، بەرگری، تەندروستی و راوێژکاری ئاسایشی نیشتمانیی عێراق.