ژمارەیەک کارمەندی هاتووچۆی سلێمانی دەستگیرکران
كارمه‌ندانى به‌ڕێوه‌به‌رایه‌تى هاتووچۆى سلێمانى
SNN- هه‌وراز ئه‌حمه‌د
به‌یانى ئه‌مڕۆ یەکشەممە به‌شێك له كارمه‌ندانى هاتووچۆ به مه‌به‌ستى ناڕه‌زایه‌تى ده‌ربڕین له به‌رده‌م به‌ڕێوەبه‌رایه‌تى هاتووچۆ مانگرتنیان راگه‌یاند و به‌و هۆیه‌شه‌وه ژماره‌یه‌كیان لێده‌ستگیركرا.
هاوكار ڕه‌فیق نوێنه‌رى كارمه‌ندانى مانگرتوو به SNNى راگه‌یاند: “ئه‌مڕۆ وه‌ك ناڕه‌زایه‌تى ده‌ربڕینێك دژى دواكه‌وتنى مووچه ویستمان بچینه به‌رده‌م به‌ڕێوەبه‌رایه‌تى گشتى هاتووچۆ، به‌ڵام له لایه‌ن هێزێكه‌وه رێگریمان لێكرا و رێگەیان نه‌دا ناڕه‌زایه‌تییه‌كه‌مان بگه‌یه‌نینه به‌رده‌م به‌ڕێوەبه‌رایه‌تى”.
وتیشى: “به‌هۆى ئه‌و رێگرییه‌ى لێمانكرا گرژیى كه‌وته نێوان كارمه‌ندانى هاتووچۆ و ئه‌و هێزه‌وه له ئه‌نجامدا پێنج كارمه‌ندى هاتووچۆ ده‌ستگیركران و ده‌وام و مامه‌ڵه‌ى هاووڵاتییانیش راگیرا”.
ئاماژه‌ى به‌وه‌شكرد: “له ئێستادا له كۆبوونه‌وه‌داین بۆ ئه‌وه‌ى میكانیزمێك بدۆزینه‌وه تاوه‌كو ئه‌و كارمه‌ندانه ئازادبكه‌ین، چونكه تاوه‌كو ئه‌وان ئازادنه‌كرێن ئێمه ناچینه‌وه سه‌ر كار و رێگەش ناده‌ین مامه‌ڵه‌ى هاووڵاتییانیش راییبكرێت”.
مانگی رابردوو کارمەندانی ناڕازی هاتووچۆی سلێمانی مۆڵەتی مانگێکیان دایە بەڕیوەبەرایەتییەکەیان کە بەدەم داواکانیانەوە بێت، ئەمڕۆ 26ی تەمووز ئەو وادەیە کۆتایی دێت.
