هاووڵاتییانی هەولێر بە گیرفانی بەتاڵەوە لە چاوەڕوانیی جەژندان

SNN- مەودا مستەفا

بەهۆی دواکەوتنی مووچە و بەتاڵیی گیرفانیانەوە، هاووڵاتییانی شاری هەولێر ناتوانن وەک پێویست پێشوازیی لە جەژن بکەن و نیگەرانن لە دۆخی دارایی خۆیان.

هاووڵاتییانی شاری هەولێر دەڵێن “ئێمە جەژن بە چی بكەین بە گیرفانی بە تاڵ و بەو قەرزانەی لەسەرمان كۆبووەتەوە، یان بەو ژیانە سەختەی ڕۆژانە دەیگوزەرێنین”.
محەمەد عوسمان پیشەی فەرمانبەرە و لەبەر نەبوونیی و كرێچیەتی كاری دەستگێڕیی دەكات لەناو بازاڕی شێخەڵای شاری هەولێر، دەڵێت: “ئاخر لە كوێی دونیا بووە فەرمانبەر ببێتە دەستگێڕ و بە درێژیی رۆژ هاوار بكات 5 دانە كێك بە هەزار دینار، یان بەو شێوەیە چۆن جەژن بكەم كە گیرفانم بەتاڵ بێت” .
شاڵاو رەزا، هاووڵاتییەكی ترە و دەڵێت “دوو منداڵام هەیە لە ماڵی دایكم پارەم قەرزكردووە بۆ ئەوەی ئەمڕۆ جلیان بۆ بكڕم ئەمە ژیانمانە بەو شێوەیە و حكومەتیش هیچ باكی نییە”.

نەبی غەریب خاوەنی دووكانی فرۆشتنی جلوبەرگە و دەڵێت: “بە بەروارد بە جەژنەكانی تر خەڵک زۆر كەم دێنە بازاڕ و پێداویستییەكانی جەژن دەكڕن، هۆكارەكەشی ئەوەیە حكومەت مووچەی دابەشنەكردووە” .

بەبڕوای شارەزایانی ئابووری ئەگەر حكومەتی هەرێمی كوردستان لەگەڵ حكومەتی ناوەند نەگاتە رێککەوتن، بۆ مانگی داهاتوو لێبڕینی مووچە زیاتر دەبێت و رەنگە لەنێوان %25 بۆ %30 بێت و بۆ ئەمساڵیش تەنها دوو مووچەی تر بدات.