ئەمریکا دەستی بە کشانەوەی هێزەکانی لە ئەڵمانیا کرد

SNN-

لەسەر فەرمانی دۆناڵد ترەمپ، سوپای ئەمریکا 12 هەزار سەربازی خۆی لە شتوتگارت-ی ئەڵمانیاوە دەگوێزێتەوە بۆ بەلجیکا و ئیتاڵیا، ئەوەش لە چوارچێوەی پلانێکدایە بۆ فراوانتر کردنی بوونی خۆیان لە ئەوروپا.

سەرۆکی ئەمریکا مانگی رابردوو وتی: “لە ئەڵمانیا دەکشێینەوە و سوپاکەمان بۆ 25 هەزار سەرباز کەمدەکەینەوە، رۆژی چوارشەممەی رابردووش پێنتاگۆن رایگەیاند “کە 12 هەزار سەربازی ئەمریکا لە ئەڵمانیا دەکشێننەوە”.

مارک ئیسپەر وەزیری بەرگری ئەمریکا لەسەر ئەو پرسە وتی: “ئەو 12 هەزار سەربازە دەگوێزینەوە بۆ هەریەک لە ئیتاڵیا و بەلجیکا و لەوێ بڵاوەیان پێدەکەین”.

پێدەچێت تەنیا 5400 سەربازی سوپای ئەمریکا لە ئەڵمانیا بمێننەوە و پاش جێهێشتنی ئەو وڵاتەش بەشێوەیەکی دەوریی لە وڵاتانی تری ئەوروپا کە دواتر دیاریدەکرێن، جێگیر دەکرێن.