له رۆژانى جه‌ژندا سه‌ردان بۆ لای زیندانیكراوان قه‌ده‌غه‌یه
وێنە: SNN
SNN-هه‌وراز ئه‌حمه‌د
به‌ڕێوەبه‌رى راگه‌یاندنى چاكسازى گه‌ورانى سلێمانى رایده‌گه‌یەنێت: “له رۆژانى جه‌ژنى قورباندا سه‌ردانى سزادراوانی چاكسازى گه‌ورانى سلێمانى ناكرێت، به‌ڵام راسته‌وخۆ پاش پشووه‌كانى جه‌ژن سه‌ردانیکردنیان ده‌ستپێده‌كات”.
فه‌رهاد قادر به‌ڕێوەبه‌رى راگه‌یاندنى چاكسازى گه‌ورانى سلێمانى به SNNى راگه‌یاند: لە دوای پشووەکانی جەژنی قوربان راستەوخۆ سەردانیکردنی سزادراوان دەستپێدەکاتەوە لەلایەن کەسوکاریانەوە بەپێی رێكار و ڕێنماییه ته‌ندروستییه‌كان”.
وتیشى: “بەپێی رێنماییەکانی وەزارەتی کار و کاروباری کۆمەڵایەتی سەردانیکردن تەنها بۆ سێ کەسی پلەی یەکی سزادراوەکەیە تاوه‌كو قەرەباڵغی زۆر دروستنەبێت”.
دەشڵێت: “دەبێت ئەو سێ کەسەی دێن بۆ سەردانیکردن پشکنینی کۆرۆنایان کردبێت و ناسنامەیان پێبێت و رێنماییە تەندروستییەکان جێبەجێبکەن و ماسک و دەستکێشیان پێبێت، خشتەی سەردانیکردن دواتر بەپێی بلۆک و راڕەوەکان بڵاو دەکرێتەوە و سزادراوان کەسوکاریان ئاگادار دەکەن”.
له باره‌ى پێدانى مۆڵه‌ت به سزادراوان بۆ ئه‌وه‌ى سه‌ردانى كه‌سوكاریان بكه‌نه‌وه، فه‌رهاد قادر وتى: “بڕیارى پێدانى مۆڵه‌ت به سزادراوان چۆته بوارى جێبه‌جێكردنه‌وه، ته‌نها ئه‌وه‌ى ماوه، رێنماییه‌كانمان بۆ بنێرن ئه‌و سزادراوانه‌ى كه مۆڵه‌ت ده‌یانگرێته‌وه، ده‌بێت دوو كه‌فیلى هه‌بێت و تاپۆى خانوو، بڕه پاره‌یه‌ك به گه‌رەنتى دابنێت، مۆڵه‌ته‌كه‌ش له 2 مانگ كه‌مترە”.
جێگاى ئاماژه‌پێكردنه له نێو چاكسازى گه‌ورانى سلێمانى له ئێستادا زیاتر له 1200 سزادراو بوونیان هه‌یه.
