فڕۆكەی بێفڕۆكەوان بەسەر چەند گوندێكی شارباژێڕدا دەسووڕێنەوە و بۆردوومان دەكەن

SNN-عەلی حەمە سەعید
ئەمڕۆ دوو جار فڕۆكەی بێفڕۆكەوان كە گوماندەكرێت فڕۆكەی توركیابن، بەسەر چەند گوندێكی سنووری شارباژێڕدا سووڕاونەتەوە و لە جاری دووەمدا بۆردوومانیان كردووە بەو هۆیەشەوە ئاگر لە سنووری چەند گوندێك كەوتووەتەوە، بەڵام هێشتا زیانی گیانی ڕانەگەیەندراوە.

كامەران حەسەن، قایمقامی قەزای ماوەتی سەر بە پارێزگای سلێمانی بە SNNی ڕاگەیاند: ئەمڕۆ دوو جار فڕۆكەی بێفڕۆكەوان سنووری شارباژێڕیان بۆردوومان كرد، بەجۆرێك بۆردوومانەكە سنووری دەشتی ژاژۆلان و كوێرەكانی-ی گرتووەتەوە، كە نزیكەی سێ كیلۆمەتر لە گوندی گەڵاڵەوە دوورە.

ئاماژەی بەوەشكرد، لەگەڵ ئەوەی لە %100 دڵنیا نین ئەو فڕۆكانە سەر بە چ وڵاتێكن، بەڵام گوماندەكرێت فڕۆكەی بێفڕۆكەوانی توركیان بن، كە بەهۆی ئەو بۆردومانانەوە ئاگر لە سنوورەكە كەوتووەتەوە و زیانێكی زۆر بە ڕەز و باخی هاووڵاتییان و ژینگەی ناوچەكە كەوتووە.

قایمقامی قەزای ماوەت ئەوەشی خستەڕوو، تا ئێستا بۆمان ڕووننەبووەتەوە كە بەهۆی ئەو بۆردومانانەوە زیانی گیانی لێكەوتووەتەوە یاخود نا، بەڵام بەهۆی ئەوەی لە ئێستادا دەوامی فەرمانگەكان نەكراوەتەوە، ناتوانین لیژنە پێكبهێنین بۆ لێكۆڵینەوە.