تاقیکردنەوەکانى خولى دووەمى پۆلە ناکۆتاکان لە هەولێر دواخرا

SNN

بەڕێوەبەرایەتى گشتى پەروەردەى هەولێر تاقیکردنەوەکانى خولى دووەمى پۆلە ناکۆتاکانى بۆ 16ی ئاب دواخست.

بەڕێوەبەرایەتى گشتى پەروەردەى هەولێر بڵاویکردەوە، “ئاماژە بە کۆبوونەوەی ئەنجوومەنی وەزارەت لە بەرواری چواری ئابی 2020 سەبارەت بە تاقیکردنەوەکانی خولی دوەمی پۆلە ناکۆتاکان لە 4 بنەڕەتی تا 11 ی ئامادەیی و قۆناغی ناکۆتایی خوێندنی پیشەیی و ئیسلامی، دەسەڵات درا بە بەڕێوەبەری گشتی پەروەردەی پارێزگاکان بۆ بەڕێوەبردن و کۆتاییهێنان بە تاقیکردنەوەکان بەڕەچاوکردنی رەوشی تەندروستی.”

ئاماژەى بەوەشکردووە، “دوای تاوتوێکردن و هەڵسەنگاندنی رەوشی تەندروستی و رای پارێزگا و بەڕێوەبەرایەتی گشتی تەندروستیی هەولێر و پەروەردەی قەزاکان و بەڕێوەبەرایەتی سەرپەرشتیکردن بەمەبەستی رەچاوکردنی رەوشی تەندروستی بڕیارماندا تاقیکردنەوەکانی خولی دوەمی پۆلە ناکۆتاکان لە 4 بنەڕەتی تا 11 ی ئامادەیی و قۆناغی ناکۆتایی خوێندنی پیشەیی و ئیسلامی دوابخرێت بۆ ڕۆژی 16ی ئاب، واتە رۆژی یەکشەممەی داهاتوو یەکەم تاقیکردنەوە بەڕێوەدەچێت.”