بە واژوو کردنی رێککەوتنێکی ئاویی، یۆنان و میسر ئەردۆغان تووشی دۆخێکی نەخوازراو دەکەن

SNN–

وەزیری دەرەوەی یۆنان رایدەگەیەنێت “ئەو رێککەوتنەی سەرۆککۆماری تورکیا لەگەڵ فایز سەڕاج سەرۆکی حکومەتی لیبیا واژووی کردووە، شوێنەکەی تەنەکەی خۆڵە”.

ئەمڕۆ هەریەک لە یۆنان و میسر رێککەوتنێکی ئاوییان واژوو کرد بەمەبەستی پاراستنی سنووری ئاویی نێوانیان و سەقامگیر کردنی دۆخی ئەمنی و ئابووریی ئاویی ناوچەکە.

نیکۆس دندیاس وەزیری دەرەوەی یۆنان لەپرێس کۆنفرانسێکدا ئەمڕۆ پێنجشەممە وتی: “لەگەڵ میسر رووبەڕووی هەموو ئاڵنگارییەکانی ناوچەکە دەبینەوە و لە چەند رۆژی داهاتووشدا بە کردەوە دەبینرێت”.

وتیشی: ” ئەو رێککەوتنەی سەرۆککۆماری تورکیا لەگەڵ فایز سەڕاج سەرۆکی حکومەتی لیبیا واژووی کردووە، شوێنەکەی تەنەکەی خۆڵە”.

مانگی نۆڤەمبەری رابردوو تورکیا و حکومەتی ویفاقی نیشتمانی لیبی رێککەوتننامەیەکی ئەمنیی ئاوییان واژوو کرد کە بووە جێی رەخنەی وڵاتانی جیهان بەتایبەت یۆنان و قوبرس و میسر، لەو کاتەشەوە ناکۆکییەکانی نێوان وڵاتانی ئەوروپا و تورکیا بەرەو لوتکە چوون، چونکە تورکیا لەو سنوورە ئاوییانەدا دەیەوێت وزە بدۆزێتەوە و کۆنترۆڵی سنوورەکە بکات.