هاوژین عومەر: له‌م سه‌ردانه‌دا روونده‌بێته‌وه ئه‌مریكا تا چه‌ند هاوكارى كازمى ده‌كات
مسته‌فا كازمى، سه‌رۆكوه‌زیرانى عێراق | فۆتۆ: نوسینگه‌ى راگه‌یاندنى سه‌رۆكوه‌زیران
SNN
راوێژكارێكى سه‌رۆككۆمارى عێراق رایده‌گه‌یه‌نێت: له‌م سه‌ردانه‌دا روونده‌بێته‌وه كه تا چه‌ند ئه‌مریكا پشتیوانى كازمى ده‌كات له چاكسازییه‌كانیدا، ده‌شڵێت: “ئه‌مریكا ده‌توانێت یارمه‌تى سه‌رۆكوه‌زیران بدات”.
هاوژین عومەر، راوێژکاری سەرۆککۆماری عێراق به ده‌نگى ئه‌مریكاى راگه‌یاند: “سه‌ردانه‌كه‌ى مسته‌فا كازمى، سه‌رۆكوه‌زیرانى عێراق گرنگى تایبه‌تى خۆى هه‌یه، چونكه له‌م سه‌ردانه‌دا روونده‌بێته‌وه كه تا چه‌ند ئه‌مریكا پشتیوانى كازمى ده‌كات له چاكسازییه‌كانيدا، له به‌دیهێنانى خواستى شه‌قام، به‌ڕێوه‌بر‌دنى هه‌ڵبژاردنێكى بێ خه‌وش و نه‌هێشتى میلیشياكان”.
وتیشى: “هاتنى كازمى به ره‌زامه‌ندى ئه‌مریكا بووه، ئه‌مریكاش ده‌توانێت هاوكارى بكات له سه‌رخستنى كابینه‌ى حكومه‌ته‌كه‌یدا”.
له وه‌ڵامى ئه‌و پرسیاره‌ى كه ئه‌مریكا چۆن ده‌توانێت هاوكارى سه‌رۆكوه‌زیرانى عێراق بكات، هاوژین عومه‌ر ئه‌وه‌شده‌خاته‌ڕوو: “ئه‌مریكا ده‌توانێت له‌ڕووى دارایی و سیاسییه‌وه پشتیوانى كازمى بكات بۆ سه‌رخستنى حكومه‌ته‌كه‌ى و بوونیاتنانى ژێرخانى ئابوورى وڵات”.
ئه‌مڕۆ سێشه‌ممه مسته‌فا كازمى، سه‌رۆكوه‌زیرانى عێراق و تیمێكى یاوه‌رى به‌ڕێكه‌وتن به‌ره‌و واشنتن، بڕیاره له كۆشكى سپى له‌گه‌ڵ دۆناڵد تره‌مپ، سه‌رۆكى ئه‌مریكا كۆبێته‌وه.
