بەهۆى هێرشەکەى تورکیاوە دوو هاووڵاتى مەدەنى شەهید بوون

SNN

شانەى راگەیاندنى ئەمنى عێراق رایگەیاند: بەهۆى هێرشەکەى شەوى رابردووى تورکیاوە لە گوندى بەهراڤیا دوو هاووڵاتى مەدەنى شەهیدبوون و یەکێکیش برینداربووە.

ئێواره‌ى دوێنێ سێشەممە فڕۆکه‌ جه‌نگییه‌کانى تورکیا گوندى بەهراڤیایان له‌ کۆمه‌ڵگه‌ى خانه‌سۆر سه‌ربه‌ شنگال بۆردومانکرد‌ و ئۆتۆمبێلێکیان کرده‌ ئامانج.

لە بارەى وردەکارى رووداوەکەوە شانەی راگەیاندنی ئەمنیی عێراق راگەیەنراوێکى بڵاوکردەوە کە تێیدا هاتووە، “کاتژمێر 7:00 ئێوارەی دوێنێ سێشەممە فڕۆکە بێ فڕۆکەوانەکانی تورکیا ئاسمانی عێراقیان بەزاندووە و ئۆتۆمبێلێکی جۆری پیکابیان لە گوندی (بەهراڤیا)ی سەربە کۆمەڵگەی خانسۆر لە ناحیەی شمالی قەزای شەنگال کردە ئامانج، بەهۆیەوە دوو هاووڵاتی مەدەنی شەهیدبوون و شۆفێرەکەیان برینداربووە”.

لە راگەیەنراوەکەدا ئەوەشخراوەتەڕوو، “جگە لە گوندى بەهراڤیا فڕۆکە جەنگییەکان گوندى بارەیان سەبە خانەسۆر کردووەتە ئامانج، بەڵام تا ئێستا زیانەکانى نەزانراون”.

هێرشى فڕۆکەکانى تورکیا لە ئاسمانى عێراق لە چوارچێوەى هەردوو ئۆپراسیۆنى (چنگى هەڵۆ) و (چنگى) پڵنگدایە کە تورکیا ماوەى چەند مانگێكە لە هەرێمى کوردستان لەدژى چەکدارانى پارتى کرێکارانى کوردستان دەستیپێکردووە.