سەرچاوەیەکی هەواڵگری: تورکیا هەژموونی خۆی لە لوبنان بەهێزدەکات

SNN

سایتی عەرەبیەی سعودی لە زاری چەند سەرچاوەیەکی هەواڵگری لە لوبنان ئەوەی ئاشکراکردووە، تورکیا لە هەوڵی بەهێزکردنی هەژموونی خۆیدایە لە باکووری لوبنان و دەیەوێت سوود لەو بۆشاییە سیاسییە وەربگرێت کە لەو وڵاتە دروستبووە.

دوو سەرچاوەی هەواڵگری لە لوبنان وتوویانە: “تورکیا بڕێکی زۆر لە چەکی رەوانەی باکووری لوبنان کردووە و ئەوەش نیگەرانی لەلا دروستکردووین”.

لەبارەی هەوڵەکانی تورکیا بۆ بەهێزکردنی هەژموونی لە لوبنان، چواری مانگی رابردوو دوو هاووڵاتیی تورکی و دوو هاووڵاتی بە رەگەز سووری، کە لە تورکیاوە گەشتیان بۆ لوبنان کردبوو، بە چوار ملیۆن دۆلارەوە دەستگیرکران، محەمەد فەهمی وەزیری ناوخۆی لوبنانیش لەوبارەیەوە وتبووی: “بڕیاربووە ئەو پارەیە ببەخشرێتە خۆپیشاندەران کە لە دژی حکومەتی لوبنان خۆپیشاندان دەکەن”.

رۆژنامەی ئۆرشەلیم پۆستی ئیسرائیلیش نوسیویەتی، تورکیا چاوی بڕیوەتە پارێزگای عەکار لە باکووری لوبنان، کە شوێنی نیشتەجێبوونی کەمەنەتەوەی تورکمانن، دانیشتوانەکەشی بیروباوەڕێکی قوڵی ئیسلامییان هەیە.

هاوکات سایتی ئەساس-ی لوبنانی، کە نوهاد مەشنوق وەزیری ناوخۆی پێشووی لوبنان خاوەندارێتی دەکات بڵاویکردووەتەوە بەها حەریری کوڕە گەورەی رەفیق حەریری سەرۆکوەزیرانی کوژراوی لوبنان لە پڕۆژەیەکی هەواڵگری تورکیاوە تێوەگلاوە کە تایبەتە بە دروستکردنی رێکخراوی سیاسی و ئایینی کە رێگەخۆشکەربن لە بەهێزکردنی هەژموونی تورکیا لە لوبنان و لە کاتی گونجاودا بڕژێنە ناو شەقامەکان.

ماڵپەڕە لوبنانیەکە ئەوەشی بڵاوکردووەتەوە: پەیوەندی راستەوخۆ لە نێوان پارتی ئاکەپەی فەرمانڕەوای تورکیا و لقێکی سەر بە ئیخوان موسلمینی لوبنان کە ناویان (جەماعە ئیسلامیە)یە، هەیە.

لە ناوەڕاستی مانگی تەمووزیشدا رۆژنامەنووسێک بەناوی فیراس شوفی، لە وتارێکیدا کە لە رۆژنامەی ئەخبار-ی نزیک لە حزبوڵاوە بڵاویکردبووەوە، ئەوەی نوسیبوو: “چالاکییەکانی تورکیا لە لوبنان چەندین شێوازی جیاواز لەخۆدەگرن، هەمووشیان بەیەک ئاڕاستەدا دەڕۆن، ئەویش بەهێزکردنی هەژموونی تورکیایە لە ناو موسڵمانە سونەکانی لوبناندا، بەتایبەتی لە باکووری ئەو وڵاتە، بە ئامانجی بەرپەرچدانەوەی هەژموونی سعودیە و ئیمارات لە جەنگی سەرکردایەتیکردنی “سوننەکانی جیهان” کە لە نێوان سعودیە و هاوپەیمانەکانی لەلایەن و تورکیا و هاوپەیمانەکانی لەلایەکی دیکە بەڕێوەدەچێت.

رۆژنامەنووسەکە باسی لە چەند پڕۆژەیەکی تایبەتکردووە کە لەلایەن TIKA (ئاژانسی هەماهەنگی و هاریکاری تورکی)ەوە جێبەجێدەکرێن، پڕۆژەکانیش کردنەوەی رێگاوبان و هەڵکەندنی بیری ئاو و هاوکاری خۆراک دەگرێتەوە.