سێ مووشەکى کاتیۆشا لە ناوچەى سەوز کەوتنەخوارەوە
مووشەکى کاتیۆشا| فۆتۆ: Baghdad Today
SNN
ئەمڕۆ هەینى شانەى راگەیاندنى ئەمنى عێراق رایگەیاند: سێ مووشەکى کاتیۆشا لە ناوچەى سەوز کەوتوونەتە خوارەوە و ئاشکراشیکرد: هیچ زیانێکى گیانیان نەبووە.
لە بەیاننامەیەکدا کە بەرەبەیانى ئەمڕۆ بڵاوکراوەتەوە لەبارەى وردەکارى هێرشەکەوە شانەى راگەیاندنى ئەمنى عێراق روونیکردووەتەوە، “سێ مووشەکى کاتیۆشا لە سێ ناوچەى جیاواز کە ناوچەى تاڕادەیەک چۆڵبوون و هیچ دامەزراوەیەکى فەرمیان تێدا نەبووە لە ناوچەى سەوز لە بەغدا کەوتوونەتەخوارەوە، هیچ زیانێکى گیانیان نەبووە”.
شانەى راگەیاندنى ئەمنى لەبارەى سەرچاوەى مووشەکەکانەوە ئاشکرایکردووە، “لە ناوچەى (البیجیەى غەربى) یەوە ئاراستەى ناوچەى سەوز کراون”.
ماوەى زیاتر لە شەش مانگە ناوبەناو لە سەرچاوەى جیاوازەوە مووشەک ئاراستەى ناوچەى سەوز دەکرێن، پێشتریش چەند جارێک ئەو مووشەکانە ئاراستەى باڵیۆزخانەى ئەمریکا کراون لەو ناوچەیە و تەنانەن چەند جارێک زەنگى ئاگادارکردنەوەى ئەو باڵیۆزخانەیە لێیداوە، بە هەمان هۆکاريش سیستمى دژە مووشەکى لە باڵیۆزخانەکە جێگیر کراوە.
