پڕۆژە وەستاوەكان زیانی زۆری هەبووە بۆ هاوڵاتییانی هەولێر

SNN- مەودا مستەفا

هاووڵاتییانی شاری هەولێر رایدەگەیەنن بەهۆی وەستانی پڕۆژەكانەوە زیانی زۆرمان بەركەوتووە، لە كاتێكدا ئێمە پارەی تەواومان داوەتەوە خاوەن پڕۆژەكە و كەچی هێشتا تەواویان نەكردووە، بەناچاری ئێستا لە خانووی كرێداین و پارەشمان لەسەر حیساب دەكەن و مووچەش نییە بیدەینە كرێ.

عەبدولخالق یاسین یەکێک لە سودمەندبووانی پڕۆژەیەكەی نیشتەجێیبووە دەڵێت: لە ساڵی 2010وە، پارەم داوەتەوە خاوەن پڕۆژەكەو تاوەكو ئێستا نزیكەی 3 دەفتەرەم داوە و هێشتا سەدا 80 پڕۆژەكە تەواو نەبووە، لەكاتێكدا دەبوو لە ساڵی 2014 پڕۆژەكە تەواو بوایەوە، چەندین جاریش چووینەتە دەستەی وەبەرهێنان كەچی كەس بەدەم داواكاریەكەمانەوە نایەت.

هەروەها شەوكەت رێبوار هاووڵاتییەكەی دیکەی شاری هەولێرە و دەڵێت :”ماوەی چەندان ساڵە ئێمە وەكو دانیشتووانی گەڕەكی فەرمانبەران شەقامی سەرەكییان بۆ دروست كردوین، بەڵام تاوەكو ئێستاش قیرتاو نەكراوە لە كاتێكدا بەروە وەرزی زستان دەچین و نازانین چۆن منداڵەكانمان رەوانەی خوێندنگە بكەین”.

SNN پەیوەندی كرد بە دەستەی وەبەرهێنان مەبەستی وەگرتنی داتا و ئامار لەبارەی پڕۆژە وەستاوەكان و هۆكاری داواكەوتنی پڕۆژەكان بەڵام پەیوەندەیكان بەردەست نەبوون، لە ئێستا لە سنووری پارێزگای هەولێر بە سەدان پرۆژەی یەكەی نشتەجێبوون كاركردن تێیاندا وەستاوە و هەروەها بەشێک لە خاوەنی پڕۆژەكانیش لەبەر قەرزاری هەڵهاتوون و كوردستانیان بە جێیهێشتووە.