ئێران رۆژانە هەزار و 500 بارهەڵگر کاڵا هەناردەی هەرێم دەکات

SNN

ئەندامێکی ژووری بازرگانی هاوبەشی عێراق و ئێران رایگەیاند: رۆژانە ئێران هەزار و 500 بارهەڵگر کاڵا هەناردەی خاڵە سنوورییەکانی هەرێمی کوردستان دەکات و بازرگانی نێوان ئێران و عێراق بۆ مانگێک دەگاتە 500 ملیۆن دۆلار.

سەید حەمید حوسەینی، ئەندامی ژووری بازرگانی هاوبەشی نێوان عێراق و ئێران رایگەیاندووە: “لە ماوەی پێنج مانگی ئەمساڵدا بە قەبارەی 2 ملیار و 406 ملیۆن دۆلار کاڵا هەناردەی عێراق کراوە، ئەوە نیشانی دەدات کە مانگانە نزیکەی 500 ملیۆن دۆلار قەبارەی ئەو بازرگانیەیە لەگەڵ عێراق”.

ئەو ئەندامەی ژووری بازرگانی ئێران و عێراق ڕایگەیاندووە: “لە چوار مانگی سەرەتای ئەمساڵدا بە بەهای یەک ملیار و 940 ملیۆن دۆلار کاڵا هەناردەکراوە مانگێک دوای ئەوە نزیکەی 500 ملیۆن دۆلار، ئەوەش نیشانی دەدات بازرگانی نێوان ئەو دوو وڵاتە روو لە بەرزبوونەوەیە”.

حوسەینی ئاشکرایکردووە، ئامارەکان ئاماژەن بۆ پەیوەندی باشی بازرگانی نێوان هەردوو وڵاتە.