پشكنینی كۆرۆنای نەخۆشخانەكانی هەڵەبجە له فڕۆكه‌خانه‌كانى هه‌رێم ئیشى پێ ناكرێت
ئه‌نجامدانى پشكنینى ڤایرۆسى كۆرۆنا | فۆتۆ: عه‌لى حه‌مه‌سه‌عید / SNN
SNN – عەلی حەمە سەعید
دوای ئەوەی ژمارەیەك گەشتیار كە پشكنینی كۆرۆنای نەخۆشخانەكانی هەڵەبجە دەبەنە فڕۆكەخانە نێوده‌وڵه‌تییه‌كانى سلێمانی و هەولێر لێیان وەرناگیرێت و پێیان ده‌وترێت: دەبێت دووبارە هەمان پشكنین لە نەخۆشخانەكانی سلێمانی یان هەولێر ئەنجامبدەنەوە، به‌ڕێوه‌به‌رى تاقیگه‌كانى هه‌ڵه‌بجه‌ش روونكردنه‌وه ده‌دات.
دەشتی عەزیز، بەڕێوەبەری تاقیگەكانی سەربە بەڕێوەبەرایەتی گشتی تەندروستیی هەڵەبجە بە SNNی راگەیاند: “دروستبوونی گرفت لە وەرنەگرتنی ئەو پشكنینانەی كۆرۆنا كە لە تاقیگەكانی ئێمە بۆ گەشتیاران ئەنجامدراون بە مەبەستی گەشتكردنییان، پەیوەندی بە خودی فڕۆكەخانەكانەوە نییە، بەڵكو بەشێك لە هێڵە فڕۆكەوانييه‌كان كار بەو پشكنینانە ناكەن بەتایبت هێڵی فڕۆكەوانی ( قەتەر)، چونكه دوێنێ یەك دوو حاڵەتی لەو شێوەیەمان هەبووە”.
وتیشى: “لە ئێستادا لەگەڵ ئیدارەی فڕۆكەخانەكانی هەولێر و سلێمانی لە پەیوەندیداین بۆ ئەوەی ئەو گرفتە چارەسەر بكرێت، چونكە ئێمە نووسراوی فەرمی حكومەتمان بەدەست گەیشتووە كە دەبێت پشكنینی كۆرۆنا بۆ ئەو كەسانە بكەین كە بە نیازی ئەنجامدانی گەشتن لە فڕۆكەخانەكانی هەرێمەوە بۆ هەر مەبەستێك ببێت، بۆیە پێدەچێت ئەمڕۆ بتوانین كۆتایی بەو گرفتە بهێنین”.
وتەكانی بەڕێوەبەری تاقیگەكانی سەربە بەڕێوەبەرایەتی گشتی تەندروستی هەڵەبجە لە كاتێكدایە كە دوای ئەوەی حكومەتی هەرێم و وەزارەتی تەندروستی بڕیاریاندا كە پشكنینی ڤایرۆسی كۆرۆنا بكەن بۆ ئەو كەسانەی كە گەشتدەكەن بۆ دەرەوەی هەرێم و عێراق یان بە ئارەزوومەندانە دەیانەوێت ئەو پشكنینە بۆ خۆیان بكەن ئەوا بڕی 60 هەزار دیناریان لێ وەردەگیرێت، وەكو مەرجیش بۆ هەموو گەشتیارێك دانراوە كە دەبێت ئەو پارەیە بدات، بەڵام لە ئێستادا ئەو گەشتیارانەی كە پشكنینی نەخۆشخانەكانی هەڵەبجە دەبەنە فڕۆكەخانەی سلێمانی و هەولێر لێیان وەرناگیرێت و دەبێت دووبارە هەمان پشكنین لە نەخۆشخانەی ئەو شارانە ئەنجام بدەنەوە ئەمەش گرفتی بەسەر چوونی تكتەكانی بۆ دروستكردوون و رووبەڕووی زیانێكی زۆری كردوونەتەوە.
