هەفتەی داهاتوو یەكێتی و پارتی لەسەر ئاستی مەكتەبی سیاسی كۆدەبنەوە
لۆگۆى یهكێتیى نیشتمانیى كوردستان و پارتى دیموكراتى كوردستان | فۆتۆ: SNN
SNN-عەلی حەمە سەعید
بەمەبەستی گفتوگۆكردن لە بارەی دواین پێشهاتەکانی ناوچەكە و هاوكات زیاتر ئاسییكردنەوەی پەیوەندییەكانی نێوانیان، وابڕیارە هەفتەی داهاتوو هەریەكە لە یەكیتیی نیشتمانیی كوردستان و پارتی دیموكراتی كوردستان لەسەر ئاستی مەكتەبی سیاسی كۆببنەوە، كۆبوونەوەكەش لە هەولێر ئەنجام دەدرێت.
بە گوێرەی زانیارییەكانی SNN، چەند رۆژێكە هەریەكە لە یەكێتیی نیشتمانیی كوردستان و پارتی دیموكراتی كوردستان ئامادەیی خۆیان دەربڕیوە بۆ ئەنجامدانی كۆبوونەوەیەك لەسەر ئاستی مەكتەبی سیاسی هەردولا، بەڵام بەهۆی سەردانەكەی ئیمانوێڵ ماكرۆن سەرۆكی فەرەنسا بۆ عێراق و سەردانیكردنی ژمارەیەك لە بەرپرسانی باڵای پارتی و یەكێتی بۆ بەغدا و كۆبوونەوە لەگەڵ سەرۆكی فەرەنسا، ئەنجامدانی ئەو كۆبوونەوەیە دواكەوت.
مەكتەبی هەڵبژاردنەكانی یەكێتیی نشتیمانیی كوردستان و پارتی دیموكراتی كوردستان كۆبوونەوەی ئاسایی خۆیان ئەنجامداوە و پێدەچێت لەم چەند رۆژەدا جارێكی دیكەش كۆببنەوە بە مەبەستی تاوتوێكردنی ئەگەرەكانی هەڵبژاردنی پێشوەختەی عێراق و خۆئامادەكردنی كورد بۆ ئەو هەڵبژاردنە، هەر لەو چوارچێوەیەشدا لە هەفتەی داهاتوودا مەكتەبی سیاسی یەكێتی و پارتی كۆدەبنەوە.
کۆبوونەوەکە لە هەولێر بەڕێوەدەچێت، ئەگەریش هەیە لە بینای مەكتەبی سیاسی یەكێتی بێت لە شاری هەولێر، بەڵام ئەمە هێشتا یەكلا نەبووەتەوە.
