توێژینەوەیەک کاریگەری ڤاکسینەکەی روسیا دژ بە کۆرۆنا ئاشکرادەکات

SNN

گۆڤاری تەندروستی لانسێت، ئەنجامی توێژینەوەیەکی لەسەر ڤاکسینی دژ بە کۆرۆنا کە کۆمپانیایەکی روسی بەرهەمیهێناوە، دەخاتەڕوو و دەڵێت: ئەنجامەکەی دڵخۆشکەرە و کاریگەری لاوەکی مەترسیداری نییە.

گۆڤارەکە، دوای توێژینەوەی لەسەر ڤاکسینی (سپوتنیک ڤی)، رایدەگەیەنێت لەسەدا 100ی ئەوانەی ڤاکسینەکەیان پێدراوە دژە تەن (Antibodie) لە جەستەیاندا دروستبووە دژ بە ڤایرۆسی کۆرۆنا، هەروەها هیچ کاریگەرییەکی لاوەکی مەترسیداری نەبووە.

توێژینەوەکە 42 رۆژی خایاند، 38 کەس خۆبەخشانە ڤاکسینەکەیان لەسەر تاقیکرایەوە و ئەنجامەکەی دڵخۆشکەربوو.
مانگی رابردوو روسیا، وەک یەکەم وڵاتی جیهان، رایگەیاند مۆڵەتی بەکارهێنانی بەخشیوەتە ڤاکسینێکی کۆرۆنا، کچەکەی ڤیلادیمێر پوتین سەرۆکی روسیاش یەکێک بوو لەو کەسانەی کە ڤاکسینەکەی وەرگرت.

ئامادەبوونی ئەو ڤاکسینە بۆ بەکارهێنان، لەکاتێکدا بەشێکی زۆر لە پسپۆڕانی تەندروستی باسیان لەوەکردبوو ئامادەبوونی ڤاکسینێک چەند ساڵێکی پێویستە، گومانی ئەوەی دروستکردبوو، لە دروستکردنی ئەو ڤاکسینەدا پەلە کراوە و تاقیکردنەوەی پێویست بۆ زانینی زیان و کاریگەرییەکانی نەکراوە.

گۆڤاری لانسێت، یەکێکە لە کۆنترین گۆڤارەکانی بەریتانیا کە هەفتانە لە بڵاوکراوەکانیدا توێژینەوەکانی دەخاتەڕوو.