عەشیرەتەکانی جاف و خۆشناو: لەمەبەدوا وەک برا پێکەوە دەژین
هەردوو عەشیرەتەکە چەکی سوک و قورسیان بەرامبەریەک هەڵگرتبوو
SNN-محەمەد مستەفا
دوای ئەوەی هەردوو عەشیرەتەکانی جاف و خۆشناو لەسەر کێشەی زەوی و زار چەکی قورس و سوکیان دژ بە یەک هەڵگرت، ئەمڕۆ رایانگەیاند کێشەکەیان چارەسەربووە.
ئەو دوو عەشیرەتە لە راگەیەندراوێکی هاوبەشیاندا باس لەوەدەکەن کە کۆتایی بە کێشەی نێوانیان هاتووە و بەڵێنیان داوە: “وەک برای یەکتری بە گیانی برایەتی و تەبایی لە ئیدارەی راپەڕین پێکەوە بژین”.
لەبارەی چۆنیەتی چارەسەرکردنی کێشەکانی نێوانیان، باس لەوە دەکەن: لە کاتی دروستبوونی گرژی و ئاڵۆزیەکانی دوو رۆژی رابردوو کە خەریک بووە بەرەو کارەسات بڕوات دەزگا ئەمنیەکانی ئیدارەی راپەڕین کەمتەرخەم بوون لە چارەسەرکردنی کێشەکە”.
دەشڵێن: دوای ئاڵۆزبوونی دۆخەکە بە نێوەندگیری بەڕێوەبەری پێشووی ئاسایشی ڕاپەڕین و بەڕێوەبەری ئێستای ئاسایشی رۆژهەڵاتی هەولێر لە کۆیە لیوا (حەیدەر حاجی تانی) کێشەکەیان چارەسەر کراوە .
کێشەی نێوان ئەو دوو عەشیرەتە لەسەر موڵکداری ریزە دوکانێک بوو لە دەربەندی ڕانیە.
وێنەی ریزە دووکانەکە، محەمەد مستەفا
