یۆنان: ئەو کۆچبەرانەی مافی پەنابەرێتی نایانگرێتەوە با وڵاتەکە جێبهێڵن

SNN

وەزیری کۆچ و کۆچبەرانی یۆنان رایگەیاند، ئەو هۆتێلانەی کە کۆچبەرانی تێدا دەمێننەوە دادەخرێن، داواشی لەو کۆچبەرانە کرد کە مافی پەنابەرێتی نایانگرێتەوە کە “بەڕێزەوە یۆنان جێبهێڵن و بگەڕێنەوە وڵاتانی خۆیان”.

نوتیس میتاراکیس وەزیری کۆچ و کۆچبەرانی یۆنان لەدوای سەردانێکی مەیدانی بۆ هەردوو ناوچەی کیلکیس و کاڤالا، بە میدیاکانی وڵاتەکەی راگەیاند: “ئەمساڵ هەموو ئەو هۆتێلانە دادەخەین کە کۆچبەران تیایدا دەمێننەوە و ژمارەیان 49 هۆتێلە”.
وتیشی: دەبێت پەلە بکرێت بە پێدانی مافی پەنابەرێتی بەو کۆچبەرانەی کە شایستەن و مافی پەنابەرێتی دەیانگرێتەوە، بۆ ئەوەی دەست بکەن بە ژیانی ئاسایی خۆیان، مافەکانیشیان هاوشێوەی مافی هاووڵاتییانی یۆنانە و هیچ خزمەتگوزارییەکی زیادەی تێدا نییە.
بەهۆی زۆری ژمارەی کۆچبەران لە یۆنان، 67 هۆتێلی گەشتیاری ئەو وڵاتە کرابوونە شوێنی مانەوەی کۆچبەران و لەو ژمارەیەش 18 هۆتێل داخراون و ئەوانی دیکە تا ئێستا بە کراوەیی ماونەتەوە.