وێنە: بنکەیەکی تەندروستی بە گوڵی جوان و درەختی جۆراوجۆر رازێندراوەتەوە
فۆتۆ: محەمەد مستەفا
من ناوم (عومەر ئەبوبەکر)ە، تەمەنم 38 ساڵە، ماوەی 11 ساڵە کارمەندی تەندروستیم لە بنکەی تەندروستی 24 کاتژمێری مەرگە لە سنووری قەزای دووکان دەوام دەکەم و ئێستاش لێپرسراوی ئەو بنکەیەم .
پێشتر دیمەنی بنکەکە بەم شێوەیە نەبوو کەمترین سەوزایی و درەختی لێ بوو، بەڵام من ماوەی 10 ساڵە دەستم کردووە بە چاندنی درەخت و گوڵ و سەوزایی، دەیان جۆر گوڵ و داری میوەکانی قۆغ و هەنجیر و گوێز و ترێم چاندووە و بەردەوامیشم لە چاندنی درەختی زیاتر .
کاتێک کە نەخۆش یاخود خەڵکی دێنە بنکەکەمان لە سەرەتادا پیاسەیەک بەناو سروشتی سەوزایی دەوروبەری بنکەکەدا دەکەن و وێنەی یادگاری لێ دەگرن، چونکە دیمەنی سەوزایی کاریگەری هەیە لەسەر هێورکردنەوەی دۆخی نەخۆش.
جیاواز لە خزمەتکردنی بنکەکەم هاوکات لەگەڵ کۆمەڵێک لە دۆست و هاوڕێیانم چەندین چالاکی ژینگەیشم لە گوندی مەرگە و گوندەکانی دەوروبەری خۆمان ئەنجامداوە و هەزاران بەڕوومان چاندووە بۆ سەوزکردنی گوندەکانی بەری مەرگە .
