پزیشکانی رانیە داوای کردنەوەی نەخۆشخانەی گشتی رانیە دەکەن

SNN- محەمەد مستەفا

ئەمڕۆ یەکشەممە 13ی ئەیلول بەشێک لە پزیشکانی نەخۆشخانەی گشتی رانیە لە بەردەم بینای کۆنی نەخۆشخانەکە گرد بوونەوە .

لە بەیاننامەیەکدا بۆ کەناڵەکانی راگەیاندن پزیشکانی رانیە باسیان لەوەکرد هەچەندە لە کۆتایی ساڵی رابردوو کاری نۆژەنکردنەوەی نەخۆشخانەی گشتی رانیە دەستیپێکرد و بڕیاربوو لە ماوەی نزیکەی 3 مانگدا کاری نۆژەنکردنەوەی نەخۆشخانەکە بە کۆتا بێت، بەڵام دوای 5 مانگ لەو وادەیە هێشتا کارەکانی تەواو نەکراوە .

پزیشکانی رانیە باس لەوەشدەکەن: بەهۆی خەرجنەکردنی پارەوە، لە ئێستادا ئەو کۆمپانیایەی کە نەخۆشخانەی گشتی رانیە نۆژەندەکاتەوە کارەکانی راگرتووە، بۆیە بەشەکانی نەخۆشخانەی گشتی رانیە دابەشبوونەتە سەر چەند بەشێک بەو هۆیەوە بارگرانی زۆر بۆ نەخۆش دروستبووە .

پزیشکانی رانیە ئاماژه بۆ ئەوەشدەکەن، بەهۆی ئەوەی بەشێک لە نەخۆشخانەی رانیە براوەتە نەخۆشخانەی ناحیەی چوارقوڕنە، دەبێت نەخۆش بۆ گرتنی وێنەیەکی تیشکی (ئەشیعە) لەنێوان رانیه و چوارقوڕنە چەند جارێک هاتوچۆ بکات .

پزیشکانی ڕانیە داواکارن هەرچی زووە حکومەت پارەی نۆژەنکردنەوەی نەخۆشخانەی گشتی رانیە خەرجبکات، بە پێچەوانەوە لە داهاتوودا هەڵوێستی تریان دەبێت .