وردەکاری دزینی زیاتر لە دوو ملیار دینار لەلایەن كارمەندی بانكێك لە هەولێر 

SNN-بڕیار محەمەد

كارمەندی بانكێك لە هەولێر زیاتر لە دوو ملیار دینار دەدزێت، بەڵام لایەنە پەیوەندیدارەكان كارمەندەكە دەستگیردەكەن و بەشی زۆری پارەكەش دەگەڕێننەوە بۆ بانكەكە.

بەگوێرەی زانیارییەکان، کە SNN لە سەرچاوەیەکی نێو بانکەکە دەستیکەوتووە، لە بانكی منارە لە شاری هەولێر زیاتر لە دوو ملیار دینار لەلایەن كارمەندێكی بانكەكەوە دزراوە، لەكاتی حەواڵەكردنی پارەكە ئەو كارمەندە بەشێكی داخڵ كردبوو، بڕی زیاتر لە دوو ملیار دیناریشی بۆ خۆی بردبوو.

سەرچاوەکە  ئەوەشی ئاشکراکرد: “دوای لێكۆڵینەوە و بەدواداچوونی ورد لەلایەن لایەنە پەیوەندیدارەكان و دەستەی دەستپاکی، توانرا بە ماوەیەكی كەم دزینی ئەو پارەیە ئاشكرابكرێت، ئێستا كارمەندەكە بەشێکی پارەكەی گەڕاندووەتەوە بانكەكە و تەنیا 30 تاوەكو 50 ملیۆن دیناری ماوە بیگەڕێنێتەوە، هەموو رێكارە یاساییەكانیشی لە بەرامبەر دەگیرێتەبەر”.

SNN هەوڵیدا لێدوان لە کەسوکاری کارمەندی بانکەکە وەربگرێت، بەڵام بە بیانووی تەواونەبوونی لێکۆڵینەوەکان، ئامادەنەبوون هیچ روونکردنەوەیەک لەسەر ڕووداوەکە بدەن.