لەبارەی گەشتی بەکۆمەڵی زیارەتکارانی ئێرانی بۆ عێراق روونکردنەوە دەدرێت

SNN

دوای ئەوەی لە تۆڕە کۆمەڵایەتییەکان ڤیدیۆیەک بڵاوبووەوە کە گوایە، سەرباری قەدەغەکردنی گەشتی ئایینی شیعەکان، سەدان کەس لە ئێرانەوە سنوورەکانیان بڕیووە و هاتوونەتە خاکی عێراقەوە، دەستەی دەروازە سنوورییەکان روونکردنەوە دەدات.

لە راگەیەندراوێکدا، دەستەی دەروازە سنوورییەکان جەخت لەوە دەکاتەوە، کە هەموو دەروازەکان بەرووی گەشتیارانی ئێرانیدا داخراون و پابەندن بە هەموو بڕیارەکانی لیژنەی باڵای تەندروستی و سەلامەتی نیشتمانییەوە.

دەستەکە دووپاتی دەکاتەوە کە سنووری وشکانی بەهۆی بڵاوبوونەوەی ڤایرۆسی کۆرۆناوە بە رووی هاتنەناوەوەی گەشتیارە ئێرانی و بیانییەکاندا داخراوە.

ئەمەش دوای ئەوەدێت لە بەشێک لە میدیا عێراقییەکان و تۆڕە کۆمەڵایەتییەکانەوە ڤیدیۆیەک بڵاوبووەوە کە گوایە، زیارەتکارانی ئێرانی، هاوشێوەی دەروێشەکان بە کۆمەڵ گەشتیان بۆ عێراق کردووە، بە بێ ئەوەی هیچ رێوشوێنێکی یاسایی بۆ هاتنە ناوەوە بگرنەبەر یاخود پشکنینی کۆرۆنا بکەن.