یاریزانێکی سەرەکی ریاڵ مەدرید تووشی کۆرۆنا بووە

SNN Sport

یاریزانی سەرەکی یانەی ریاڵ مەدرید مارتن ئۆدیگارد، تووشی ڤایرۆسی کۆرۆنا بووە و ئەمڕۆ جارێکی تر پشکنینی بۆ دەکرێتەوە.

رۆژنامەکانی ئیسپانیا بڵاویانکردووەتەوە، دوای یاری ریاڵ مەدرید و ریاڵ سۆسیداد، پشکنینی کۆرۆنا بۆ یاریزانانی یانەی ریاڵ مەدرید کراوە، دەرکەوتووە ئۆدیگارد هەڵگری ڤایرۆسەکەیە.

هەروەها یانەکە دەیەوێت دووبارە پشکنین بۆ ئەو یاریزانە بکاتەوە، ئەگەر جارێکی تر دەرکەوت هەڵگری ڤایرۆسەکە بێت، ئەوا  لە یاریزانانی یانەکەی جیادەکرێتەوەو کەرەنتین دەکرێت.

ئۆدیگارد لە یەکەم یاری خولی ئیسپانیا کە بەرامبەر بە ریاڵ سۆسیداد بوو، 1-1 تەواو بوو، بە سەرەکی یاری کرد، تا رۆژی دووشەممە لەگەڵ یاریزانانی هاوڕێی مەشق  وراهێنانی بە کۆمەڵی کردووە.

لە یانەی ریاڵ سۆسیدادیش پاش یاریەکەی بەرامبەر بە ریاڵ مەدرید  پشکنینی کۆرۆنا بۆ هەموو یاریزانەکان کراوە،هیچ یاریزانێک هەڵگری ڤایرۆسەکە نەبووە.