گەندەڵی لە خزمەتکردنی فڕۆکە جەنگییەکانی عێراقدا بەردەوامیی هەیە

SNN

پەرلەمانتارێکی لیژنەی ئاسایش و بەرگری هۆشداریی دەدات لە کارەساتێک کە دووچاری 24 فڕۆکەی کۆری دەبێت گەر هەرچی زووە حکومەت بودجەی چاککردنەوەیان بۆ تەرخان نەکات.

مانگی ئایاری 2019 فەرماندەیی هێزی ئاسمانیی عێراق رایگەیاند، چوار فڕۆکەی جەنگی دیکەی جۆری “تی50″ـی کۆری گەیشتوونەتە عێراق ئەویش بەپێی گرێبەستێک حکومەتی عێراق لە ساڵی 2013 لەگەڵ کۆریای باشوور  ئیمزای کردووە بۆ کڕینی 24 فڕۆکەی جۆری T50 بە 100 ملیۆن دۆلار.
مەهدی تەقی پەرلەمانتاری عێراق ئەمڕۆ هەینی رایگەیاند “لەکاتی میوانداریکردنی جومعە عیناد وەزیری بەرگری عێراقدا بۆیان دەرکەوتووە کە ئەو 24 فڕۆکەیە هیچ خزمەتگوزارییەکیان بۆ دابین نەکراوە لەڕووی چاککردنەوەوە”.

وتیشی: “بەردەوامیدان بەو فڕۆکانە کە لەکار نەکەون، پێویستی بە بڕی 2 ملیۆن دۆلار هەیە تا لە پەککەوتن رزگار بکرێن”.

لە ساڵانی 2017 و 2018 عێراق دووەم و سێیەم کاروانی فڕۆکەکانی جۆری T50ی پێگەیشت کە لە 12 فڕۆکە پێکهاتبوون و پێشتریش کاروانی یەکەمی ئەو فڕۆکانە کە لە شەش فڕۆکە پێکهاتبوو گەیشتنە عێراق و لەئێستادا 24 فڕۆکە لەو جۆرە لەعێراقدان.

پێشتریش بەهۆی گەندەڵییەوە فڕۆکە (ئێف 16)ەکانی عێراق پاش کشانەوەی کۆمپانیا ئەمریکییەکان لە بنکەی ئاسمانیی بەلەد، دووچاری بێ خزمەتیی بوونەوە و تا ئێستا هیچ هەنگاوێکیان لەلایەن وەزارەتی بەرگری عێراقەوە بۆ نەنراوە.