بەشێک لە مامۆستایانی سلێمانی و هەڵەبجە و گەرمیان و ڕاپەڕین خۆپیشاندانیان ئەنجامدا

SNN

پەیامنێرانی SNN لە سلێمانی و هەڵەبجە و گەرمیان و ڕاپەڕین رایانگەیاند، بەشێک لە مامۆستایان لەگەڵ لێدانی یەکەم زەنگی خوێندندا بایکۆتی دەوام و خۆپیشاندانی ناڕەزاییان دەستپێکردووە، دژ بە خراپی بار و گوزەرانیان و دواکەوتن و لێبڕینی مووچەکانیان.

لە شاری سلێمانی، لەبەردەم پەروەردەی رۆژئاوا بەشیک لە مامۆستایان گردبوونەوە و ناڕەزایی خۆیان سەبارەت بە باروگوزەرانیان نیشاندا.

سیروان محەمەد پەیامنێری SNN لە گەرمیان رایگەیاند: مامۆستایانی سنووری گەرمیان لەبەردەم باخچەی لەیلا قاسم لە شاری کەلار دژی خوێندنی ئۆنڵاین و دواکەوتن و لێبڕینی مووچە خۆپیشاندانیان کردووە.

وتیشی: خۆپیشاندەران دواتر بە ڕێپێوانێک بەرەو پەروەردەی کەلار رۆیشتوون تا داواکارییەکانیان بگەیەننە پەروەردەکە.

هاوکات عەلی حەمەسەعید پەیامنێری SNN لە هەڵەبجە رایگەیاند: لە هەڵەبجە خۆپیشاندانی مامۆستایان دەستیپێکردووە و باس لەوەدەکەن دەوامی خوێندن بایکۆت دەکەن. ئاراس محەمەد، یەکێک لە مامۆستایان بەشدار لە خۆپیشاندانەکەی هەڵەبجە وتوویەتی: “نیگەرانین کە دەبینین سەرۆکی حکومەت زەنگی ساڵی خوێندن لێدەدات وەک بڵێیت هیچ رووینەدابێت، بە بێ ئاماژەدان بە خراپی باری گوزەرانی مامۆستایان و دواکەوتن و لێبڕینی مووچە”.

ئەو مامۆستایە وتیشی: ئێمە ئەمڕۆ سێ‌ داواكاریی سەرەكیمان هەیە، یەكەم دابەشكردنی موچە بە بێ‌ لێبڕین هەر 30 ڕۆژ جارێك، هەروەها دامەزراندنی مامۆستایانی وانەبێژ لە ناوەندەكانی خوێندن، هاوكات ڕەخساندنی هەلیكار بۆ دەرچووانی دانەمەزار و باشتركردنی باری گوزەرانی هاوڵاتیان یەكێكی دیكە یە لە داواكارییەكانمان، ئەگەریش وەڵاممان نەدرێتەوە بەردەوام دەبین لە خۆپیشاندان و ناڕەزایەتییەكانمان .