چەكی بێ مۆلەت رێژەی تاوانی لە هەولێر بەرەو هەڵکشان بردووە

SNN- بڕیار محەمەد

بوونی چەك دەبێـتە هۆكاری دروستبوونی مەترسی لەسەر ژیان و ئاسایشی هەرێمی كورستان و پێشێلكردنی یاسا و پاراستنی مافی هاووڵاتییانە، زۆینەی تاوانەکانیش بەتایبەت كوشتن، هۆكارەکەی بوونی چەكی بێ مۆڵەتە .

باست ئەحەمەد ناوێكی خوازراوە و نزیكەی 2 ساڵ پێش ئێستا لەگەڵ ناسیاوێكی خۆی دەبێتە شەڕیان و ناسیاوەكەی بەچەكێکی بێ مۆڵەتەوە تەقەی لێدەكات و گولەیەك بەر قاچی  باست دەكەوێت، دواتر دەچێتە لای پزیشكێكی خزمیان تا تیماری بكات.

بەڵام دكتۆرەكە بە باستی وتووە ئەگەر گولەكە لە قاچت بێنمە دەر، كەم ئەندام دەبیت و قاچەكەت لەدەستدەدیت و نزیكەی 2 ساڵە بەو ئازارەوە دەژی و تاوەكو ئێستاش سكاڵای تۆمار نەكردووە  .
باست دەڵێت: “بۆیە سكاڵام تۆمار نەكردووە لە ماوەی رابردوو ئەو كوڕە چەندان تاوانی گەورەتری ئەنجامداوە كەچی دەستگیرنەكراوە و زیاتر لە دوو ساڵیشە سكاڵایەكی تری لەسەرە لە یەكێک لە بنكەكانی پۆلیس، بەڵام تاوەكو ئێستا دەستگیرنەكراوە، كاتێكیش ئەو شتانە دەبینم گەیشتوومەتە ئەو بڕوایەی پۆلیس و دادگاكان هیچ شتێك لەگەڵ ئەو كوڕە ناكەن و منیش بڕیارمداوە سكاڵای لەسەر تۆمار نەكەم” .

محەمەد گۆمەشینی، وتەبیژی دەستەی سەربەخۆی مافی مرۆڤ بەSNNی راگەیاند “ئێمە وەكو دەستەی سەربەخۆی مافی مرۆڤ جارێكی تر جەختدەكەینەوە، كەوا نابێت چەك لەدەست بنەماڵە و عەشیرەت و حیزب بێت و بە ئاشكرا مانۆڕی سەربازی بكەن، بەڵكو دەبێ چەك بگەڕێتەوە دەست دەزگا ئەمنییە فەرمییەكان و هاووڵاتی و حزب لەچەك دابماڵدرێن”.

دەشڵێت: “ئەو هەنگاوە بەبەستنی كۆنفڕاسێكی نیشتمانی دەنرێت، كە هۆكار و چارەسەریەكان بخرێنەڕوو تیایدا و لایەنە پەیوەندیدارەكان بەشدار بن”.

بۆ وەرگرتنی زانیاری زیاتر لەسەر هۆكاری دروستبوونی تاوانەكان و كار و چالاكییەكانی پۆلیس بۆ كۆنترۆڵكردنی دۆخەكە SNN پەیوەندیكرد بە هۆگر عەزیز وتەبێژی پۆلیسی هەولێر، بەڵام پەیوەندییەكە بەردەست نەبوو .