نەتەوەیەکگرتووەکان هەڵوێستی خۆی لەبارەی حکومەتەکەی کازمی نیشاندا
Photo by Michael Gottschalk
نەتەوەیەکگرتووەکان پێشوازی لە پێکهێنانی حکومەتی نوێی عێراق کرد و داوایان لێکرد، چاکسازییەکی راستەقینە بۆ باشترکردنی ژیانی گەلی عێراق بکات.
وتەبێژی سکرتێری گشتی نەتەوەیەکگرتووەکان رایگەیاند: “پێویستە حکومەتی نوێی عێراق بۆ بەرژەوەندی تەواوی وڵاتەکە کاربکات، لە ڕێگەی پرۆسەیەکی سیاسییەوە کە ژن و گەنج و هەموو پێکهاتە ئایینی و نەژادییەکان تیایدا بەشداربن.
لەلایەکی دیکەوە جێنین هێنیس پلاسخارت، نوێنەری نەتەوەیەکگرتووەکان لە عێراق رایگەیاند: “پێویستە کابینەکەی کازمی بە خێرایی تەواو بکرێت، بۆ ئه‌وه‌ی حكومه‌تی نوێ بتوانێت به‌په‌له ئاوڕ لە ئاڵنگارییه‌كانی په‌یوه‌ست به ئاسایش و سیاسه‌ت و ئابوری و ته‌ندروستی هه‌نگاو بنێت”.
ئاماژەی بەوەشکردوە، حکومەت رووبەڕووی دۆخێکی سەخت بووەتەوە، کە هه‌رگیز بواری کات بەفیڕۆدان نییە، پێویستە رووبەڕووبوونەوەی قەیرانی ئابووری، کە بەهۆی پەتای ڤایرۆسی کۆرۆنا و دابەزینی نرخی نەوتەوە زیاتر دژوار بووە، ببێتە کاری لەپێشینە.
دوو رۆژ لەمەوبەر ئەندامەکانی ئەنجومەنی نوێنەرانی عێراق بە کۆی دەنگی زۆرینەی ئەندامەکانی، مستەفا کازمی وەک سەرۆک وەزیرانی نوێی عێراق پەسەندکرد.
