سیناریۆکانی پشت کوشتنی بەڕێوەبەری ئاسایشی سەرزێرێ لەنێوان پەکەکە و میتی تورکدا

SNN
خوێندنەوەی جیاواز بۆ کوژرانی بەڕێوەبەری ئاسایشی دەروازەی سنووریی سەرزێرێ دەکرێت، گومانەکان لەسەر پەکەکەن کە ئەوان بکەر بن، سەرچاوەیەکیش بۆ SNN دەڵێت: “میتی تورک بەو کارە هەستاوە”.

ئێوارەی ئەمڕۆ پێنجشەممە غازی ساڵح ئالیخان بەڕێوەبەری ئاسایشی دەروازەی سەرزێرێ لە سنووری قەزای ئامێدی تەقەی لێکرا و پاش گەیشتنی بە نەخۆشخانە، گیانی لەدەستداوە.

دوو سیناریۆ هەن لە پشت کوژرانی ئەو پەرپرسەی ئاسایشی پارتی، یەکێکیان گومانە لەسەر پارتی کرێکارانی کوردستان و دەوترێت بەهۆی ئەوەی بەنیازی دانانی ئامێری جی پی ئێس بووە لەسەر بارەگایەکی پەکەکە، لە دوورەوە بە قەناس پێکراوە و کوژراوە.

سەرچاوەیەکی باڵا لەناو هێزەکانی پەکەکە بە SNNی وت: “پەکەکە کاری لەو شێوەیە ناکات، “گەر ئێمە بەنیازی هەنگاوێکی لەو شێوەیە بین، خەڵکی گەورە دەکەینە ئامانج”.

سیناریۆیەکی تر هەیە و دەوترێت تورکیا بەنیازی فراوانکردنی ناوچەی سنووریی حەفتانین-ە و دەستی داوەتە پاکتاوی هەموو ئەو کەس و لایەنانەی لەو سنوورە جموجۆڵیان زۆرە.

تۆڕە کۆمەڵایەتییەکان لە باشووری کوردستان دوو رای جیاواز و پێچەوانە باسدەکەن کە هەندێکیان پێیانوایە پەکەکە ناوبراوی کوشتبێت، بەشەکەی تر دەڵێن تورکیا پلانی هەیە دەستڕۆیشتوویی خۆی لە سنوورەکە زیاتر بکات و قۆناغی داهاتووی ئۆپراسیۆنەکەی فراوانکردنی ناوچەی حەفتانین-ە.

دەروازەی سەرزێرێ، دەروازەیەکی سنورییە لە نێوان ھەرێمی کوردستان و تورکیا و دەکەوێتە سنوری ناحیەی کانی ماسێ سەر بە قەزای ئامێدی لە باکوری پارێزگای دھۆک.