پەرلەمانتارێک: “کازمی 2 کەسی کردۆتە بەرپرس کە گومان هەیە لە کوشتنی سلێمانی بەشدار بن”

SNN

ئەندامێکی پەرلەمانی عێراق لە فراکسیۆنی بەدر سەرۆکوەزیران بەوە تۆمەتبار دەکات بەوەی دوو کەسی دامەزراندووە لە شوێنی هەستیاردا کە هەم گومانی بەعسی بوون و هەم گومانی ئەوەشیان لەسەرە کە دەستیان هەبێت لە کوشتنی قاسم سلێمانی و ئەبو مەهدی موهەندیس-دا.

عودەی شەعلان ئەبوجۆن دەڵێت: “کازمی کار بۆ ئەوە دەکات هەژموونی بەعسی و ئەمریکییەکان لە عێراق بەهێز بکات و ئەو دوو کەسە پێشتر لە بنەماڵەیەکی بەعسی بوون و لە دەزگا هەواڵگرییەکانی سەدام کاربەدەست بوون”.

وتیشی: “کەسی یەکەم باوکی بەڕێوەبەر بووە لە دەزگای هەواڵگری سەردەمی رژێم و ئێستاش خۆی بەڕێوەبەری نووسینگەی کازمییە لە دەزگای هەواڵگری”.

راشیگەیاند “کەسی دووەمیش بە هەمان شێوە لە هەواڵگریی سەردەمی بەعس کاریکردووە و ئێستا بەڕێوەبەری یەکێکە لە دەروازە سنوورییەکان”.

ئاشکراشیکرد “کە ئەو دوو کەسە پێشتر دەستیان هەبووە لە کوژرانی قاسم سلێمانی و ئەبو مەهدی موهەندیس و نابێت سەرۆکوەزیران لەم کارانەی ببەخشرێت”.