سبەی لە کام بەڕێوەبەرایەتیەی پەروەردە مووچە دابەشدەکرێت؟
مووچە
SNN
لەدوای ئەوەی پەروەردەی رۆژئاوای سلێمانی رایگەیاند، بەهۆی ئامادەنەبوونی لیستی مووچەوە سبەی مووچەی بەڕێوەبەرایەتییەکە دابەشناکرێت، بەڕێوەبەرایەتی پەروەردەی رۆژهەڵاتی سلێمانی راگەیەندراوێکی هاوشێوەی بڵاوکردەوە و رایگەیاند: سبەی مووچە دابەشناکەین.
لە راگەیەندراوەکەی پەروەردەی رۆژهەڵاتدا هاتووە: “ئاگاداری سەرجەم قوتابخانە و باخچە و ئامادەییەکانی سنووری پەروەردەی رۆژهەڵات و هۆبەکانی ناو دیوان دەکەین کە سبەینێ لیستی مووچە دابەش ناکەین، بەهۆی کارکردنی بەردەوام لە رێکخستنی لیستی مووچە بۆ مانگی نۆ کە لەئێستادا کارەکان تەواو نەبوون و فەرمانبەرانی بەشی ژمێریاری بەم بارودۆخە لە ناو دیوانی پەروەردەن بۆ تەواوکردنی لیستی مووچە”.
ئاماژه بهوهشدراوه، “ئاگاداری سەرجەم قوتابخانە و باخچە و ئامادەییەکانی سنووری پەروەردەی رۆژهەڵات و هۆبەکانی ناو دیوان، دەکەین کە سبەینێ لیستی مووچە دابەش ناکەین”.
بەڕێوەبەرایەتی پەروەردەی هەڵەبجەش لە راگەیەندراوێکدا ئەوەی خستەڕوو، بەهۆی ئامادەنەبوونی لیستی مووچە، دابەشکردنی مووچە بۆ یەکشەممە دواخراوە.
بەگوێرەی بەدواداچوونەکانی SNN، جگە لەو دوو بەڕێوەبەرایەتییە، بەڕێوەبەرایەتی پەروەردەی چەمچەماڵ، پەروەردەی شارباژێڕ، پەروەردەی شارەزوور لیستی مووچەکانیان ئامادەکردووە و بڕیارە سبەی مووچە دابەشبکەن.
ئەمە لەکاتێکدایە لە ماوەی رابردوودا وەزارەتی دارایی، بڕیاریدا مووچەی مانگی ئەیلول دابەشبکرێت لەبری مانگی نیسان، کە ئەوەش بووەهۆی دواکەوتنی ئامادەکردنی لیستی مووچەی وەزارەتی پەروەردە و تەندروستی.
