وێنه: پاڵه‌وانێتی كراوه‌ی مه‌له‌وانی یاریزانانی شاری سلێمانی به‌ڕێوه‌چوو
دیمەنێک لە پاڵەوانێتیەکە
ئه‌رده‌ڵان محه‌مه‌د – SNNsport
دوای زیاتر له 10 مانگ له نه‌بوونی پاڵه‌وانێتی ، یه‌كێتیی مه‌له‌وانی سلێمانی یه‌كه‌م پاڵه‌وانێتی كراوه‌ی خۆی بۆ یاریزانانی كوڕان و كچانی یانه‌كان و ناوه‌نده وه‌رزشییه‌كان ئه‌نجامدا.
به‌ڕێوەبه‌رایه‌تی لاوانی سلێمانی و یه‌كێتیی مه‌له‌وانی سلێمانی هه‌ستان به‌ئه‌نجامدانی یه‌كه‌مین پاڵه‌وانێتیی مه‌له‌وانی كراوه‌ی یاریزانانی كوڕان و كچانی سێ یانه و هه‌شت ناوه‌ندی وه‌رزشی شاری سلێمانی بۆ ئاسته‌كانی (بێچوه‌شێران ، تازه‌پێگه‌یشتووان ، لاوان و پێشكه‌وتووان) بۆ جۆره‌كانی (مه‌له‌ی سه‌ربه‌ست-سنگه مه‌له- پشته مه‌له- په‌پوله مه‌له- تێكه‌ڵاو).
فه‌لاح محه‌مه‌د سه‌رۆكی یه‌كێتیی مه‌له‌وانی سلێمانی ئاماژه‌ی به‌وه‌دا:” دوای ئه‌و بارودۆخه‌ی به‌سه‌ر كوردستان و جیهاندا هات به‌هۆی بڵاوبوونه‌وه‌ی ڤایرۆسی كۆرۆنا ، وه‌رزشیش یه‌كێكە له‌و بوارانه‌ی كه كاریگه‌ری زۆری له‌سه‌ر هه‌بووه، به‌ڵام ئێمه توانیمان له‌ماوه‌ی كه‌متر له مانگێك دوای كردنه‌وه‌ی خولێكی راهێنان دووه‌م چالاكی خۆمان به‌ئه‌نجامدانی ئه‌م پاڵه‌وانێتییه ئه‌نجام بده‌ین”.
وتیشی:” ده‌مانه‌وێت به‌ئه‌نجامدانی ئه‌م پاڵه‌وانێتییه جارێكیتر یاریزانان بگه‌ڕێنه‌وه ناو مه‌له‌وانگه‌كان و بگه‌ڕێنه‌وه ئاست به‌رزی خۆیان، هه‌روه‌ها ده‌مانه‌وێت له‌م پاڵه‌وانێتیه‌دا خاوه‌ن پله‌ی یه‌كه‌مه‌كانی هه‌ر ئاستێك بانگهێشتی هه‌ڵبژارده‌ی سلێمانی بكه‌ین بۆ به‌شداریكردن له پاڵه‌وانێتیه‌كانی داهاتووی كوردستان و عێراق”.
له‌ئێستادا شاری سلێمانی به تاكه پارێزگا داده‌نرێت له‌سه‌ر ئاستی عێراق كه دوای مۆڵه‌تی ده‌ست پێكردنه‌وه‌ی چالاكیه‌كان زۆرترین چالاكی وه‌رزشی له‌ژێر رێنماییه‌كاندا ئه‌نجام ده‌دات، ئه‌وه‌ش خۆشحاڵی لای وه‌رزشكاران و راهێنه‌ران و یاریزانان دروستكردووه.
