عێراق دادگایەکی تایبەت بە تاوانەکانی داعش پێکدەهێنێت

SNN

پەرلەمانی عێراق رایدەگەیەنێت “لە سەرووبەندی ئەوەدان دادگایەکی تایبەت بە تاوانەکانی داعش پێکبهێنن، شارەزایەکی یاساییش دەڵێت: “ئەو هەنگاوە رووکەشییە، چونکە عێراق کەمتەرخەم نەبووە لە دادگاییکردنی داعشەکان”.

ئەمڕۆ حسێن کەعبی جێگری یەکەمی سەرۆکی پەرلەمانی عێراق پێشوازیکردووە لە وەفدێکی نەتەوە یەکگرتووەکان کە هاتوون تاوتوێی کردە و تاوانەکانی پێشووی داعش بکەن کە لەعێراق ئەنجامیداون.

کەعبی رایگەیاندووە پێکهێنانی دادگایەکی تایبەت بۆ لێکۆڵینەوە و سزادانی ئەندام و لایەنگرانی داعش هەنگاوێکی باشە بۆ پتەوکردنی هەماهەنگی نێوان عێراق و نەتەوە یەکگرتووەکان.

تارق حەرب پسپۆڕی دەستووری لەمبارەیەوە دەڵێت: “پێکهێنانی ئەو دادگایە شتێکی رووکەشە و پێویست نییە، چونکە دادگاکانی عێراق پێشتر کەمتەرخەم نەبوون لە سزادانی هەر گیراوێکی داعشدا”.

حەرب رەخنەی توندی لە نەتەوە یەکگرتووەکان گرتووە لەبەرئەوەی دادگاییکردنی داعشەکانی لە عێراق بەوە وەسفکردووە کە پێودانگە نێودەوڵەتییەکانی تێدا جێبەجێناکرێت.

لەمبارەیەوە تارق حەرب دەڵێت: “ئەوەی نەتەوە یەکگرتووەکان دەیڵێت لەجێی خۆیدا نییە، چونکە هەر پرۆسەیەکی دادگاییکردن لە عێراق بەڕێوەچووبێت “یاسایی بووە و پشتی بە مادەی دەستووریی بەستووە”.