ئێران یادکردنەوەی هەڵکوتانە سەر باڵیۆزخانەی ئەمریکا لەوڵاتەکەی قەدەغە دەکات

SNN

لەسەر راسپاردەی لیژنەی سەلامەتیی کۆرۆنا و بە بیانووی تەشەنەی ڤایرۆسەکەوە، ئەنجوومەنی هاریکاری ئیسلامیی ئێران خۆپیشاندان و یادکردنەوەی هەڵکوتانە سەر باڵیۆزخانەی ئەمریکا لە تاران قەدەغە دەکات.

پێشتر هەریەک لە نەوشیروان موحسینی حاکمی تاران و عەلی زالی سەرۆکی لیژنەی قەڵاچۆکردنی کۆرۆنا داوایانکردبوو ساڵیادی 41 ەمینی هەڵکوتانە سەر باڵیۆزخانەی ئەمریکا لە تاران کە دەکاتە سبەینێ سێشەممە، نەکرێتەوە.

ئەو دوو بەرپرسە لە نامەیەکیاندا بۆ عەبدولرەزا فەزڵی وەزیری ناوخۆی ئێران نووسیویانە “بۆ سەلامەتی گیانی هاووڵاتییان و زیاتر تەشەنە نەکردنی کۆرۆنا، نابێت یادی ئەو رۆژە بکرێتەوە لە شاری تاران”.

لەسەر راسپاردەی ئەوان لیژنەی هاریکاری ئیسلامیی ئێران بڕیاریدا تەنیا ژمارەیەکی رەمزیی خەڵک یادەکە لەبەردەم بینای کۆنی باڵیۆزخانەی ئەمریکا لە تاران بکەنەوە و قەرەباڵغیی نەکرێت.

لە ئێستادا و تا رۆژی هەینی داهاتوو هەریەک لە شاری تاران و 24 پارێزگای دیکەی ئەو وڵاتە بەهۆی ڤایرۆسی کۆرۆناوە قەدەغەی سەرتاسەریی تێدا راگەیەنراوە.

رۆژی 4ی نۆڤەمبەری ساڵی 1979 خوێندكارانی ئێران و ژمارەیەک هاووڵاتی دیکە هەڵیانكوتایە سەر باڵیۆزخانەی ئەمریكا لە تاران.

هەرچەندە خوێندكاران رووبەڕووی بەرگری سەخت بوونەوە و ژمارەیەك خوێندكار كوژران، بەڵام دەستیان بەسەر باڵیۆزخانەكەدا گرت، دواتریش ئەو ڕۆژە ناونرا “رۆژی خوێندكار”.

دوای دەستبەسەرداگرتنی باڵیۆزخانەی ئەمریكا بۆ ماوەی 444 رۆژ 52 دیپلۆماتكاری ئەمریکا لە باڵیۆزخانەكە وەك بارمتە دەستبەسەر کران.