فەرەنسا هەڕەشەی سەپاندنی سزا بەسەر تورکیا دەکات
SNN
وەزیری دەرەوەی فەرەنسا نیگەرانی نیشاندا سەبارەت بە وتەکانی ئەم دواییەی رەجەب تەییب ئەردۆغان و هۆشداریشیدا لەوەی وڵاتەکەی سزا بەسەر ئەنقەرە بسەپێنێت.
ژان ئیڤ لودریان وەزیری دەرەوەی فەرەنسا ئەمڕۆ لە لێدوانێکیدا بۆ رادیۆی یۆرۆپ 1 وتوویەتی: “ئەردۆغان بانگەشەی ئەنجامدانی توندوتیژی و دروستکردنی رق و کینە دەکات کە ئەمە جێگەی قبوڵکردن نییە”.
لودریان رایگەیاند: ئەنجومەنی ئەوروپا بڕیاریداوە رێکاری پێویست دژ بە دەسەڵاتدارانی تورکیا بگرێتەبەر بەمەبەستی فشارخستەسەر وڵاتەکە، لە ئەجێنداکاندا تاوتوێی سەپاندنی سزا دەکرێت.
دوێنێ دەسەڵاتدارانی فەرەنسا کۆتاییان بە چالاکی گروپی “گورگە خۆڵەمێشییەکان”ی تورکیا هێنا بە هۆکاری ئەوەی “هانی چالاکی توندڕەوانەیان داوە”، کە ئەمە نیگەرانی حکومەتی ئەنقەرەی لێکەوتەوە و هۆشداریدا لەوەی “بە توندترین شێواز وەڵامیان بۆ فەرەنسا دەبێت”.
