یاریزانێکی تورکی منداڵێکی خۆی دەخنکێنێت

SNN-

“15 خولەک هەناسەم لێبڕی”

“خۆشم نەدەویست، بۆیە کوشتم”

ئەمانەی سەرەوە قسەی جەوهەر تۆکتاش-ە و یاریزانی یانەیەکی تورکیایە بەناوی (بۆرسە یەلدریمسپۆر) کە لای پۆلیس باسی کردووە و هۆکاری کوشتنی کوڕە 5 ساڵانەکەی ئاشکرا دەکات.

تورکەکان و شەقامی ئەو وڵاتە تووشی شۆک بوون کاتێک بیستیان تۆکتاش منداڵەکەی خۆی خنکاندووە و ماوەی 15 خولەک سەرینی لەسەر دەموچاوی داناوە تا گیانی دەربچێت.

درێژەی چیرۆکەکە ئەو کاتە دەستیپێکردووە کە رۆژی 23ی مانگی رابردوو جەوهەر مناڵەکەی دەباتە نەخۆشخانە بەهۆی تەنگەنەفەسی و کۆکەوە، تا دواتر دەردەکەوێت تووشی کۆرۆنا بووە.

دوای چەند رۆژێک لەمانەوە، لەناکاو رۆژێک تۆکتاش بەهەڵەداوان دەچێتە لای پزیشکەکان و هاوار دەکات کە کوڕەکەی حاڵی باش نییە.

دوای پشکنین دەردەکەوێت مناڵەکەی گیانی لەدەستداوە و بەهۆی کۆرۆناشەوە نەبووە، تا گومان دەخرێتە سەر باوکی ئەو منداڵە و بانگ دەکرێت بۆ لێکۆڵینەوە.

دوای 11 رۆژ لە مردنی کوڕەکەی، ئەو یاریزانە تورکە دەچێتە بەردەم پۆلیس و دان بەوەدا دەنێت کە خۆی خنکاندوێتی و ماوەی 15 خولەک سەرینی لەسەر دەموچاوی داناوە تا گیانی دەرچووە.

دوای وتە وەرگرتنیشی، لای پۆلیس وتوێتی: “کە هەرگیز مناڵەکەی خۆش نەویستووە لەو رۆژەوە کە لەدایکبووە، بۆیە حەزیکردووە بیکوژێت”.